Ruihhlo dona 'Drug Free District' Lawngtlai district-ah kalpui dawn

Lawngtlai district bawrhsap Donny Lalruatsanga leh SP PC Lalchunglura te chuan nimin khan DC pisaah chanchinbu mite an kâwm a; sorkar laipuiin ruihhlo donaa hma a lakna, Nasha Mukt Bharat Abhiyan hnuaiah Lawngtlai district-a khaw tinah 'Drug Free District' project kalpui a nih dawn thu an sawi.

Donny Lalruatsanga chuan, NMBA hnuaia 'Drug Free District' project chu kum thum chhunga kalpui tur a nih thu a sawi a, "Project hi Lawngtlai district-a khaw tinah kalpui a ni dawn a, ruihhlo awm lohna khua din/siam chu thil pawimawh tak a ni," a ti a; khaw tina khawtlang hruaitute chu theihtawp chhuah tura a chah rualin, thawhpuiah chanchinbumite a sáwm.

PC Lalchunglura chuan, ruihhlo donaah NCORD leh Operation Jericho chak taka kalpui mek a nih thu a sawi a, "Ruihhlo do beihpui thlak kawngah ṭanrual thiam a pawimawh a, VC, NGO, kohhran leh mipuite thawhpuiah ka sáwm a ni," a ti.

Lawngtlai SDC Lalrindika tarlan danin 'Project: Drug - Free District- Lawngtlai' hi LADC huam chhunga khaw 99 leh CADC chhunga khaw 88-ah kalpui a ni ang.