Mizoramah pawl leh mimal 5,405 hnenah PMEGP loan pe, subsidy nuai 11,530 pe tawh

Ministry of Micro, Small & Medium Enterprises hnuaia Khadi and Village Industries Commission (KVIC), Aizawl chuan nimin khan Aijal Club-ah Prime Minister's Employment Generation Programme (PMEGP) chungchang zirhona an buatsaih. Mizoramah PMEGP loan la pawl/mimal 5,405 hnenah sorkar laipuiin subsidy cheng nuai 11,530 a pek tawh thu tarlan a ni.

Zirhonaah hian KVIC leh sorkar hotu te, bank hrang hrang aiawhte leh PMEGP loan hmang ṭangkaitute an tel a; KVIC director Dr Vineet Chaturvedi chuan, KVIC-in programme tam tak an neih zingah PMEGP chu an programme lian ber a nih thu a sawi.

KVIC Director chuan, PMEGP hmangin ṭhalai hna nei lote hnenah loan pek ṭhin a nih thu sawiin, "Loan vawi khatna an hlawhtlinpui chuan kan pe nawn ṭhin. Mizoram hi PMEGP hlawhtling taka kalpuitu state zinga mi a ni a, tunah phei chuan state sorkarin Handholding Policy a kalpui a, PMEGP nen a kal kawp mek," a ti.

PMEGP hnuaiah hian thilsiam chhuahna (manufacturing) lamah cheng nuai 50 thleng leh sumdawnna (services/business)-ah cheng nuai 20 thleng loan pek theih a ni a; ST/SC/OBC, etc zinga khawpuia chengte hnenah sorkar laipuiin an loan pûk aṭanga 25% a rulhsak a, thingtlanga chengte chu 35% a rulhsak thung.

Tarlan danin, July 1, 2016 aṭanga tun thlengin Mizoramah pawl/mimal 5,405 hnenah bank-te'n PMEGP hnuaiah loan an pe tawh a, loak an pek aṭanga sorkar laipuiin a rulhsak (subsidy) 25-35% chu a vaiin cheng nuai 11,530 a tling.

April 1, 2024 aṭanga February 19, 2026 chhungin pawl/mimal 325 hnenah PMEGP loan pek a ni a, chu'ng zinga 191 hnenah hian subsidy cheng nuai 719.09 pek a ni. Subsidy la pek loh (pending) 261 an awm a, chunga sum pek tur zat chu nuai 113.79 a ni.

Aizawl district-ah bank-te'n PMEGP hnuaiah mimal/pawl 148 hnenah loan an pe tawh a, chu'ng zinga 74 hnenah subsidy nuai 338.38 pek a ni tawh. District anga bank-te'n PMEGP loan an pek tlem berna Hnahthial district-ah mi pakhat hnenah loan pek niin, subsidy cheng nuai 1.75 a hmu.

Sorkar kum anga chhûtin, kum 2021-22 aṭanga 2025-26 kal mek thlengin Mizoram Cooperative Apex Bank-in PMEGP hnuaiah subsidy cheng nuai 3,309.94 pe tawhin, pe tam ber a ni a; Mizoram Rural Bank-in nuai 2,415.1 leh State Bank of India-in nuai 458.89 an pe tawh.

Kum 2021-22 aṭanga 2025-26 chhung veka subsidy pek tamna ber Aizawl district-ah subsidy cheng nuai 2,711.5 pek a ni a; Lunglei district (nuai 1,017.6) leh Kolasib district (nuai 990.01) ten an dawt a ni.