KHAWTHLIR

AI Impact Summit

New Delhi-ah tun hnai khan khawvel chhim lam rama artificial intelligence (AI) kaihhnawih inkhawmpui lian ber 'India AI Impact Summit 2026' neih a ni a, Mizoram sorkar aiawhin Infomation & Communication Technology department officer pali - chief informatics officer & chief AI officer C Vanlalringa, senior informatics officer Rony Lallianmawia, infomatics officer pahnih C Lalrinfela leh Lalengzuala te, Mizorama AI lama thiamna neite an tel.

Ni 100 inhlawh theih beisei a ni

Rural Development & Administrative minister Prof. Lalnilawma chuan nimin khan Assembly session-ah ZPM member Jeje Lalpekhlua zawhna chhangin, sorkar kum kal mekah MGNREGA hnuaiah ni 100 inhlawhna tur a awm theih beisei a nih thu a sawi.

MCAB branch hawng

Mizoram Cooperative Apex Bank Ltd. (MCAB) chairman Lalnunsanga chuan nimin khan Falkawnah MCAB branch thar a hawng a, MCAB branch 35-na a ni. Bank hawnna inkhawm hi MCAB chief executive officer A Lallungmuana'n a kaihruai a; chairman Lalnunsanga bakah, Falkawn VC president H Zarmawia leh Mizorama society/federation hruaitute'n thu an sawi.

Heroin man

Assam Rifles leh Excise & Narcotics department mite chuan February 23, Thawhṭanni zan dar 8:30 vel khan Siaha Council Vaih huam chhungah heroin gram 12.28 an man a; heroin neitua puh Hudson Syhly (34) s/o Robert S Chosia, Siaha Council Vaih an man bakah, mobile phone pahnih an hrênsak bawk.

Aizawl Day

Vawiin hian Lammualah Aizawl Day lawm ṭan a ni dawn a, February 27, Zirtawpni thleng a awh ang. Aizawl Day lawmna pual hian vawiin chawhma dar 10-ah hun hman ṭan a ni dawn a, chawhnu dar 2-ah a hawnna hun hman a ni ang a, Aizawl Day Award leh faina lama thawk ṭhate lawmman hlan a ni ang. Aizawl Day lawmnaah hian zan dar 10 thleng hun hman ṭhin a ni dawn a ni.

Pa khawi inzirtir

ICFRE - Bamboo & Rattan Centre (BRC) chuan nimin khan Bethlehem Vengthlanga an hmunah ni thum awh tur pâ (mushroom) khawi inzirtirna an buatsaih. Dr Albana L Chawngthu-in Bethlehem Vengthlanga mi 25-te pa khawi zirtirin, a takin a tihpui a; rraining chhungin MINECO-a Mushroom Centre tlawhpui an ni bawk ang.

Kawng siam dawn

Aizawl Traffic SP C Vanlalvena chuan hriattirna chhuahin, Dinthar kâwn leh Ebenezer Medical Center panna kawng (Siakeng Driving School kual) siamṭhat a nih dawn avangin vawiin aṭanga hna thawh zawh hma chu zing dar 7 aṭanga tlai dar 4 inkarah kawng chanve khar a nih dawn thu a tarlang.