16th FC-a Mizoram sum dawn pung tur CM-in Pathian malsawmnaah a ngai

Finance enkawltu chief minister Lalduhoma chuan, 16th Finance Commission-in sorkar laipuia chhiah tlingkhawm aṭanga Mizoramin a chan tur a tipung chu Pathian malsawmna a nih thu a sawi.

Nimina session-a zawhna hrang hrang a chhannaah Chief Minister chuan, 16th FC recommendation-ah state 19-in FC hmasa an phak loh thu a sawi a, "State pakua chiahin a hma aia tam kan dawng dawn a, Mizoram pawh kan tel. State dangte chu an lungawi lo khawp mai," a ti.

Lalduhoma chuan, Delhi-ah hmelhriat ṭha an nei loh thu sawiin, "A pung nasa ber pawlah kan ṭang hi Pathian malsawmna kan ti ringawt mai a ni," a ti a; vannei an inti a, an lawm tak zet tih a sawi.

Chief Minister chuan, Mizoram Finance Commission din a la nih loh chhan sawiin, "16th FC recommendation pharh a ni chauh a, lo din hian awmzia a nei lo, thawh tur a awm lo. Tunah chuan budget size kan hre tawh a, a rang thei anga din kan tum," a ti.

Lalduhoma chuan BJP member Dr K Beichhuah zawhna chhangin, sorkar kum kal mekah NABARD aṭangin cheng vbc 199.26 vel pûk a nih tawh thu House hrilh.

Chief Minister chuan, "NABARD hnuaia project turte hi department hrang hrangain an proposal Planning & Programme Implementation department-ah an theh;ut ṭhin a, anni hian an zirchian hnuah eligible project chu High Power Committee on NABARD meeting-ah an pharh ṭhin," a ti.

High Power Committee on NABRAD meeting-ah Rural development a nihna anga hmasawnna khairual thei tur ang berin leh NABARD hnuaia allocation awm thei zat mil zelin department hrang hrangah sem darh ṭhin a nih thu Lalduhoma chuan a sawi.