Changpât leiṭha siam dan zirho

Mizoram University-a Department of Botany leh ICAR - National Bureau of Agriculturally Important Microorganisms (ICAR- NBAIM) te chuan nimin khan Melriat community hall-ah changpât leiṭha siam leh pa khawi zirhona, 'Vermicomposting, biofertilizers and mushroom cultivation for farmers and entrepreneurs of North East India an buatsaih.

Zirhonaah hian Melriata kut hnathawktu mi 150 vel an tel a, MZU Botany department-a head of department Prof. F Lalnunmawia khuallian a ni. Khuallian chuan, training chu kut hnathawktute'n an ṭangkaipui ngei a beisei thu sawiin, pa khawi leh chanpât leiṭha siam lama bul ṭan duh tak takte chu MZU Department of Botany-in bulṭanna an ngaihtuahsak theih thu a sawi.

ICAR-NBAIM Director Dr Alok Srivastava, Organic Food Consultant, Japan integrated agriculturist Hitoshi Yokota leh MZU Department of Botany program coordinator Prof. Awadhesh Kumar te pawhin thu an sawi a; MZU-a research scholar Lalawmpuia'n pa khawi dan zirtirin, MZU Department of Botany-a mi Lalruatpuia'n changpat hmanga leiṭha siam dan a zirtir a ni.