India ram state zinga vaihlo zûk leh hmuam ti nasa ber dawttu Mizoram

Siaha district-a dan kengkawhtute pualin nimin khan Siaha Police Station conference hall-ah 'Prohibition of Electronic Cigarettes Act, 2019' zirhona buatsaih a ni a; National Tobacco Control Programme (NTCP) state nodal officer Dr Zoramthangi Renthlei-in hmanpuiin, Mizoram chu India ramah zûk leh hmuam ti nasa ber pahnihna a nih mek thu a sawi.

Dr Zoramthangi Renthlei chuan, India ram chu zûk leh hmuam uarna ram a nih thu a sawi a, "State zingah Mizoram hi zûk leh hmuam ti nasa tehnaah pahnihna kan ni mek. Tuna kan dinhmun aṭang hian dinhmun ṭha zawka ding turin sorkar leh a thawktute'n nasa takin ṭan kan la a, mipui, tlawmngai pawl leh kohhran-te nen kan ṭanrual a ngai," a ti.

Zûk leh hmuam ti lo zingah natna hlauhawm tak tak vei an awm ṭhin thu sawiin Dr Zoramthangi chuan, "Mihring hi vannei, vanduai leh laihâwl kan awm. A laihâwl hi mi nawlpui kan ni a, kan ei leh in leh nunphung avangin vannei huanga awm thei leh vanduaina tawng thei kan ni," a ti a; fimkhur leh inven reng a ngaih thu a sawi.

Zirhonaah hian Siaha district-a police te, Health department-a thawkte leh MJA aiawhte an tel a; NTCP state legal consultant Vanlalzari leh state consultant R Lalrem-ruata ten 'Prohibition of Electronic Cigarettes Act, 2019' leh 'Cigarettes and Other To-bacco Products Act (COTPA), 2003' chung-chang leh thil pawimawhte an zirtir a ni.

NTCP HOTUTE TARLAN
* Naupang leh ṭhangtharte'n tunlàina emaw tiin zûk leh hmuam an intihhmuh chho.
* E-cigarettes (vapes) hi a hlauhawm lo bik lo.
* Sports department-in 'Catch Them Young' an kalpui angin, NTCP pawhin naupang zawkte'n zûk leh hmuam an tih loh nan sikul leh sunday school-ah hma a la mek.
* Natna inkai chhâwn theih loh (non-communicable diseases) thlentu langsar ber chu vaihlo a ni.
* Zûk leh hmuam kan sim thei lo a nih pawhin tih phal lohna hmun kan zah tur a ni.