Champhai district-a kawngpui sawiho

Champhai District Road Safety Committee chu an chairman Mohammad Aaquib, bawrhsap hoin tun hnai khan an ṭhu a; Champhai district-a kawngpui hrang hrang dinhmun leh kawngpui hmangtute himna tur an thlirho.

Ṭhutkhawma tarlan danin, PWD hnuaiah Champhai khawpuia kawng pathum, District Hospital - DC Office (cheng nuai 62.64), Bethel kâwn - DFO (Eastern Circle) Office (nuai 14.42) leh, Awmpui Phei - Vety Office (nuai 18.30) siamna turin tender chhuah a ni tawh a, tender-te chu March 3, 2026-ah hawn tur a ni.

SASCI hnuaiah cheng nuai 600 hmangin DK Point - District Hospital, Dawrkaikawn - Agriculture department, PHE Road, Bethel Road - SP Bangla Junction, Vengthlang YMA Rûn - Champhai College, Selluaia Point - Champhai College, Chalchung Rûn - Vaihmun, Darthangvunga Point - NH-06 (via Saron Veng) siam tura ruahman a ni. SASCI hnuaiah vek cheng nuai 400 hmangin Champhai khawpui chhung kawng thawm ṭhatna tur hmuh beisei a ni a, Champhai - Tlangsam kawng siam nan cheng vbc 11.55 ruahman a ni bawk.

Ṭhutkhawmah hian Champhai district-a kawngpui thawm ṭhat hna thawh dan enfiah turin SDO (Sadar) kaihhruai District Road Monitoring Committee din an rêl a; hit & run case chungchanga mipui dikna chanvo zau zawka district inzirtirna atan IPRO leh DC office-te'n ruahmanna siam se, an ti.