Lawngtlai district-a bank-te credit deposit ratio 121.59%

Lawngtlai District Consultative Committee (DCC), District Level Review Committee (DLRC) leh District Level Security Committee (DLSC) chu nimin khan an chairman Donny Lalruatsanga, bawrhsap hoin an ṭhukhawm a; October-December 2025 chhungin Lawngtlai district-a bank-te credit deposit ratio 121.59% a nih thu an tarlang.

Ṭhutkhawma tarlan danin, bank-a mipuiin sum an dah luh (deposit) zat za zela bank-in mipuia sum an pûktir (credit) zat chhûtna aṭangin October-December 2025 chhunga Lawngtlai district-a bank-te CD ratio chu 121.59% a ni a; quarter hmasa July-September 2025 chhunga CD ratio 115.78% chu 5.81%-in a khûm a ni.

Sorkar kum 2025-26 chhunga Lawngtlai district-a bank-te'n loan an pek chhuah dan tur ruahmanna Annual Credit Plan aṭanga chhûtin, December 2025 thleng khan bank-te'n priority sector hnuaiah loan an pek tur zat aṭanga 73.99% leh non-proirity sector hnuaiah 229.25 % an pe tawh. PMEGP hnuaiah loan cheng nuai 42.83 hû pek a ni a, NRLM hnuaiah cheng nuai 106, PMMY hnuaiah cheng nuai 467.81 leh KCC loan cheng nuai 1578.64 hu pek a ni bawk.