Lammualah Aizawl Day lawm ṭan a ni

Nimin khan Lammualah Aizawl din champha, Aizawl Day lawm ṭan a ni a, Aizawl Municipal Corporation (AMC) mayor Lalrinenga Sailo-in a hawng. Mayor chuan, Aizawl hmasawnna leh a chengte tana service pek kawngah nasa takin AMC-in hna a thawh thu a sawi.

Lalrinenga Sailo chuan, AMC chu dan kengkawhtu an nih avangin mi ṭhenkhatin an diriam ṭhin thu a sawi a, "Khawpui dangah chuan municipality hi kum 100 chuang kal taah lo ding tawhin, an hmasawnnaah hmun pawimawh tak an chang. AMC hi kum 2010 aṭang chauha din a ni chungin a ṭhang duang hle a, Aizawl hmasawnna leh a chengte tana service pek kawngah nasa takin hna a thawk a ni," a ti.

Aizawl Day hawnnaah hian international leh national level-a chawi-mawina/lawmman dawng Aizawl tihmingṭhatu mi 21 hnenah 'Aizawl Day Award' hlan a ni a; local council ṭha 10, faina lama thawk ṭha pawl/huho 12 leh mimal 35, sanitation worker ṭha mi paruk leh bawlhhlawh phur lirthei khalhtu ṭha 10 hnenah chawi-mawina leh lawmman hlan a ni bawk.

Aizawl Day lawmna hi February 27, 2026 thleng neih a ni dawn a, chawhma dar 10 aṭanga zan dar 10 thleng hun hman ṭhin a ni dawn. Ei leh in tur leh thil chi hrang hrang zawrhna eng emaw zat siam a ni a, naupang tana a thlawna infiamna hmun leh cosplay bakah, tlai tin concert huaihawt a ni ang.