Link road atana ngaih pawimawhte thehlut turin CM-in MLA-te a chah

Chief minister Lalduhoma chuan nimin khan Assembly session-ah, agriculture/horticulture link road laih tura an ngaih pawimawhte chu a hnenah emaw, a kaihhnawih minister hnenah emaw thehlut turin MLA-te a chah.

Link road chungchanga zawhna kal zelah Lalduhoma chuan, link road mamawhna a sàn thu sawiin, "Horticulture leh Agriculture department hnuaiah link road laihna atan cheng nuai 3,000 vel kan dah. Prime Minister leh DoNER Minister-in an ngaih pawimawh em avangin oil palm link road laihna atan pawh kan duh aia tam, cheng nuai 3,000 vel dah a ni," a ti.

Chief Minister chuan, link road chu laih mup mup a nih dawn thu a sawi a, "In bial chhunga in ngaih pawimawhte chu a changtu minister emaw, kan hnenah emaw rawn thlen rawh u," tia MLA-te chahin, bial leh mipuiin khawi lai nge an mamawh hriat zung zung a ṭul thu a sawi.

Horticulture minister C Lalsawivunga chuan, tun sorkar kal mekah Horticulture department hnuaiah horticulture link road Aizawl district chhung hmun parukah PCC hmanga thawh a nih thu a sawi a, "Hmun ruka PCC link road siamna atan hian cheng vbc 2.74 ruahman a ni a, district dangah pawh hmalak zel tum a ni," a ti.

Link road chungchangah hian Agriculture minister PC Vanlalruata chuan ZPM member Lalramliana Papuia zawhna chhangin, hmun 19-ah km 143.5-a thui agriculture link road laih a nih dawn thu a sawi a, "RIDF XXX-ah hmun hniha laihna turin open tender hmangin hnathawktu tur thlan a ni tawh. RIDF XXXI hnuaiah hmun 17-a laihna turin open tender hmangin hna thawktu tur thlan a ni ang," a ti a; RIDF XXX hi ṭhâl chhunga hnathawh ṭan tum a nih thu a sawi.