ZPM mi leh sa ni lote tan pawh CM Special Package a dawn theih

Planning & Programme Implementation depart­ment enkawltu chief minister Lalduhoma chuan, ZPM mi leh sa ni lo tan pawh Chief Minister's Special Package dawn theih a nih thu nimin khan House a hrilh.

Chief Minister hian MNF member pathum - Lalchhandama Ralte, Ramthanmawia leh Prova Chakma bakah, BJP member Dr K Beichhua te zawhna inṭâwm a chháng a; ZPM mi leh sa ni lo tan pawh guidelines-in dil thei chin a tih apiangin CM Special Package an dawn theih thu a sawi.

CM tarlan danin, CM Special Package Grant 'Guidelines for Handholding Support to Progress Partners Phase II-in a sawi angin sorkarin a kalpui a; dilna chu India khua leh tui, Mizorama khawsa nghet, sorkar hnathawk lai ni lo, mahni eizawn­na kawnga ti tak takte tan dil theih a ni. Eizawnna kawng zawh mek lai hlawhtlinpui tura ti tak tak mi, puih tlak nia implementing depart­ment-in an ngaihte'n an dawng thei.

CM Special Package hnuaia hmalakna sum progress partner-te hnena pek chhuah zat chu department azirin a inang lo a, department ṭhenkhatah Rs 1,00,000 a nih laiin, ṭhenkhatah chuan a tling lo. An project activity azirin implementing department-te'n he hi an siam rem ṭhin. Sum hi progress partner-te hnenah ṭum khatah a vaia pek a ni.