Myanmar-a leiṭha tawlhruk tihtawp tumin ṭan lak a ni

Agriculture & Farmers Welfare minister PC Vanlalruata chuan nimin Assembly session-ah Myanmar lama Mizoram quota tur leiṭha (fertilizer) tawlhrûk tihtawp tumin theihtawp an chhuah thu a sawi.

ZPM member VL Zaithanzama'n Mizorama kut hnathawktute'n fertilizer an duhkhawp lei tur an hmuh loh lai a, Myanmar lama tawlhruk a awm thu sawi a ni ṭhin chu thu dik a nih leh nih loh a zawt a; Minister chuan, "Ni lo deuh a, sumdawnna kalpui an awm a ni mai thei. Fertilizer inspector, police leh magistrate-te ruaiin tihtawp tumin theihtawp kan chhuah. Vawiinah chuan a ziaawm deuhin kan hria," a ti.

PC Vanlalruata chuan, sorkar laipuiin fertilizer chu subsidy-in a kalpui thu sawiin, "90% central sorkarin a tum avangin kan leina a tlawm khawp mai. A hralhna man a to avangin Myanmar lama thawn chhuah a châkawm niin a lang," a ti a; MAHFED kaltlangin kut hnathawktute tan fertilizer lei theih reng a nih tawh thu a sawi.