KHAWTHLIR

Ruang phurh man

Social Welfare minister Lalrinpuii chuan nimin khan ZPM member VL Zaithanzama zawhna chhangin, sorkarin mi 1,888 ruang phurhna atan cheng vbc 1.97 sên a nih tawh thu House a hrilh a, "Ruang phurhna atan hian lirthei hman tur bik dah hran a ni lo a, a rem rema phurh mai ṭhin a ni," a ti.

Kawlphetha leina man bâ a awm lo

Power & Electricity minister F Rodingliana chuan, Mizoramin kawlphetha leina man ba a neih loh thu a sawi. Minister hian nimin khan Assembly session-ah ZPM member VL Zaithanzama zawhna chhangin, "Kawlphetha leina man pek ṭhat avangin rebate December 2023 - March 2024 chhungin cheng nuai 6.09, April 2024 - March 2025 chhungin vbc 2.23 leh April 2025 - March 2026 chhungin vbc 4.76 a ni a, a vaiin cheng vbc 706 dawn a ni," a ti.

VP rawn zin dawn

Vice president CP Radhakrishnan chu March 7, 2026 khian Mizoram University convocation hmanpui turin Mizoramah a rawn zin dawn. Vice President rawn zin tur chungchangah hian chief secretary Khilli Ram Meena hoin February 24, Thawhlehni khan sorkar hotute CS conference hall-ah an ṭhukhawm a; Vice President dawnsawn dan tur an rêl a ni.

BJP an hnatlang

BJP, Mizoram Ṭhalai hruaitute chu nimin khan Aizawl Day 137-na pualin Aizawl Lei leh a hnuai lam tifaiin an hnatlang. Aizawl Day a thleng leh ta chu lawmawm an tih thu tarlangin, "A bikin Aizawl lo luahlum hmasatu, Aizawl mihlun la damte leh an thlahte chibai kan bûk a, tuna Aizawl hi pêm khawm kan ni a, khawpui nuam leh lian tak a lo ni ta a ni," an ti.

Regional Language Promotion Day

The Institution of Engineers (India) Mizoram State Centre chuan February 24, Thawhlehni khan Women's Polytechnic, Aizawlah 'Regional Language Promotion Day' an hmang a, Mizo Language Development Board chairman R Lallianzuala'n a hmanpui.