Larsap hoin state din champha lawm a ni

Governor Gen. Dr Vijay Kumar Singh hoin February 24, Thawhlehni khan Lok Bhavan-ah 'Ek Bharat Shreshtha Bharat' hmalakna hnuaiah Mizoram leh Arunachal Pradesh-te state puitlinga hlankai an nih champha lawm a ni.

Gen. VK Singh chuan, Mizoram leh Arunachal Pradesh chu ram leilung leh tribal hnam ziarâng hausa tak ve ve an nih thu a sawi a, "Ram leilung tlawhpawh harsat vang leh chhan dang dangte avangin hun eng emaw chen ngaihthah ni mah se, tun hnaiah nasa takin hma an sawn. Mizoram leh Arunachal Pradesh-te hi India ram hmun pawimawh taka awm an ni a, Act East Policy-ah hmun pawimawh tak an chang," a ti.

Hmasawn turin ṭhalaite aṭanga bul ṭan a nih thu sawiin Larsap chuan, "Bairabi-Sairang rél kawng hawn tâk hian hmasawnna a rawn thlen mek a, khualzin nasa takin an pun phah. Mizoram hi India rama ziak leh chhiar thiam vekna state hmasa ber a nih bakah, sawhthing khawpui 'Ginger Capital of India' atana puan a ni," a ti a; Arunachal Pradesh chu 'Land of the Rising Sun' tia hriat a nih thu a sawi.

State pahnih din champha lawmna inkhawm hi Governor additional private secretary Lalhruaitluangi'n a kaihruai a; Arunachal Pradesh larsap Lt Gen. KT Parnaik thuchah ngaihthlak a ni a, T Romana College principal Dr Jenifer Lalbiakdiki leh MZU-a Arunachal Student Union president Api Hiba ten state pahnih chanchin an sawi. Mizoram leh Arunachal Pradesh chanchin video tawi thlirho a ni a; Regional Institute of Paramedical and Nursing Sciences (RIPANS) leh T Romana College zirlaite'n Mizo leh Arunachal Pradesh hnam lâm an entir bawk.

Northeast Areas (Re-organisation) Act, 1971 hnuaiah kum 1972 khan Mizoram chu union territory (UT)-ah puan a ni a, India ram danpui siamṭhat (The 53rd Constitutional Amendment Act, 1986) hmangin February 20, 1987 khan India ram state 23-na ni tura hlankai a ni.

Arunachal Pradesh chu North-East Frontier Agency (NEFA) tih ṭhin niin, kum 1972 khan NEFA chu UT-ah hlankai a ni a; February 20, 1987 khan India ram danpui siamṭhat (The 55th Constitutional Amendment Act, 1986) hmangin India ram state 24-na a ni.