ZADS hmangin ruihhlo do ṭan a ni; ZADS Zone II-te'n heroin an man

YMA kumpuan, 'Ruihhlo do' bawhzuina kal zelah Central YMA chuan February 20, 2026 khan Aizawlah ruihhlo do beihpui a thlâk ṭan a; Zone Anti-Drugs Squad (ZADS) an din hmanga duty-te chu CYMA hruaitute'n February 21 & 23 zan khan an tlawh kual. ZADS Zone-II chuan February 23 zan khan heroin an man.

CYMA kaihhruaia January 23, 2026 zana Aizawla YMA branch 111 aiawhte kal khawmin an rêl angin, ruihhlo dona atan hian Aizawl chu zone 10-ah ṭhen a ni a, zone tinte chu vila enkawltu tur ZADS din niin, zone huam chhunga YMA branch tin aṭangin member ruat a ni.

ZADS hrang hranga duty-te chu February 21 & 23 zan khan CYMA hruaitute'n an tlawh kual a, bul ṭan nan Rs 10,000 ṭheuh an hlan. ZADS-te mamawh leh harsatna te CYMA-in a ṭul angin a enpui zel dawn tih an tarlang. ZADS-te hi Central Anti Drugs Squad (CADS) nen an thawkho dawn a, CYMA hruaitute'n an vil bawk ang.

ZADS zinga Zone-II chuan February 23, 2026 zan khan heroin TicTac bûr 6 an man a, CADS hnenah an hlan chhawng. An chhuina kal zelah khawchhak lam aṭanga heroin a hlawma la luttua puh Vanlalena (43) s/o Zachunga (L) chu Ṭhuampuiah an man.

ZADS Zone II-ah hian YMA branch pakua - Durtlang, Durtlang Leitan, Durtlang North, Leitan Ramthar, Muthi, Nausêl, Selesih, Sihphir leh Sihphir Venghlun te an tel a ni.