Aizawl DCSO pisa lungphùm phúm

Food, Civil Supplies & Consumers Affairs minister B Lalchhanzova chuan nimin khan Mizoram New Capital Complex (MINECO)-ah Aizawl East leh Aizawl West District Civil Supplies Office (DCSO) sak thar tur lungphùm a phúm.

FCSCA Minister chuan, Aizawl district-a DCSO pisa pahnih chu an awmna a inhlat deuh avang leh mimal in luah hawh ve ve a nih avangin mahni puala pisa thar an nei tur chu a lawm thu a sawi a, "Kum 39 chhung office atan mimal in luah a nih hnua mahni puala office ṭha tak kan nei ve tawh tur hi a lawmawm a, office thar ṭha tak kan neih hunah chuan thawktute pawh phûrna nasa zawk a pek ka beisei," a ti.

B Lalchhanzova chuan, mahni bialtu DCSO hriat fuh loh vang te, DCSO awmna insawn ngaite leh office pahnih dawr kawp ngaite tan hmun pakhata DCSO pahnih dah a ni tur chu awlsamna thlentu a nih dawn a sawi a; sum leh hun tam tak humsaktu a nih a beisei thu a sawi bawk.

Aizawl East leh Aizawl West DCSO pisa tur hi SASCI 2024-25 (Part-I) sum nuai 800 hmangin sak tur a ni a, Mizo pa chhiara chhawng ruk tur niin, sq.ft 18,341 tura ruahman a ni. In satu tur contractor chu Eastmen Consultancy, Aizawl a ni a, thla 30 chhunga sak zawh tura tih a ni.

Lungphùm phúmna inkhawm hi FCSCA secretary Teresy Vanlalhruaii’n a kaihruai a, a sak hna thawk tur Eastmen Consultancy-te'n hna kalpui dan turte a sawifiah a ni.