Bill complain turin pawisa pek hmasak a ngai lo - Power & Electricity dept
Power & Electricity department chuan electric bill siam dan thar (smart billing system) hnuaia electric bill chungchangah hriattirna tichhuakin, electric bill diklo emaw, sang lutuk emaw a awm a nih chuan bialtu SDO office-ah complain tur leh bill complain turin bill (pawisa) pek hmasak a ngaih loh thu a tarlang a, "Complain chu min enfiahsakin, tih dik loh palh a awm chuan chinfel phawt tur a ni a, chinfel hnuah chauh bill pek tur a ni," a ti.
Power & Electricity department chuan, smart billing system-ah hian tih sual palh (set sual palh) awm thei a nih thu leh bill dik lo emaw, sang lutuk emaw nia hriate chu an bialtu SDO office-ah complain turin a ngen a, "Electric bill complain turin bill pek hmasak phawt a ngai kher lo a, complain chu min enfiahsakin tih dik loh palh a awm chuan chinfel phawt tur a ni a, chinfel hnuah chauh bill chu pek zawk tur a ni. Hetianga electric bill complain kan siam a, kan bill chu a dik lo a nih pawha pek hmasak phawt a ṭul nia sawi an awm chuan SDO hnenah complain theh luh vat tur a ni," an ti a, a ṭul anga hmalak a nih tur thu an tarlang.
Bill dik tak a nih erawh chuan electric hman man dik tak chu chawi hreh lo turin Power & Electricity department chuan mipui (consumer)-te a ngen bawk a; electric hman man dik tak mipuiin an chawi theih nan department chuan theihtawp a chhuah zel dawn thu a tarlang bawk.
Power & Electricity department tarlan dangte
* Hun rei tak mihring (meter reader) hmanga electric bill siam ṭhin a ni a, thla khat liamta bill consumer-in kan dawng ṭhin.
* Aizawl khawpuia consumer ṭhenkhat, smart billing system-a lut thar a piangte chu up-to-date a bill siam a lo ṭul ta.
* Hei vang hian thla khat kar awl siamrem a ngaih avangin thla khat aia rei bill (billing period ni 30 aia rei) vawi khatah siam a lo ngai ta a ni.
* Electric bill a lo sang ta ṭhin a, he bill sang bik hi smart billing system-a lut thar apiangte chu an luh thla (vawi 1) chiah a ni dawn.
* Smart meter billing system-ah chuan remote hmanga reading lak a nih tawh avangin meter reader-in reading lak sual palh (human error) a awm tawh lo a, consumer-te'n electric kan hman man dik thei ang bera siam a lo ni ta.
* Smart billing system ah pawh hian tih sual palh (set sual palh) awm thei tho a ni
* Meter chhiat vang emaw, human error emaw vanga hun rei tak electric bill dik lo chawi tawhte pawhin electric hman man dik tak kan chawi a ngai tawh dawn.
* Electric bill (rate) erawh sorkarin a ti danglam lo a ni tih kan in hriattir a; billing period rei vanga vawi khata bill pek tlak harsate tan bill counter-ah kalin installment a pek theih a ni.