KHAWTHLIR

IPR Minister-in pe

Information & Public Relation minister B Lalchhanzova chuan nimin khan Aizawl Press Club tlawhin, inthiarna hmunhmate chei ṭhatna atan MJA hnenah Rs 50,000 a hlan. B Lalchhanzova chuan, IPR a enkawl chhungin a theih ang anga journalist-te hamṭhatna ngaihtuahpui a tum thu sawiin, "Aizawl Press Club tuaihnum zelte pawh ka mawhah ka la a ni," a ti.

Kawng siam enfiah

ZPM Ṭhalai chuan nimin khan NH-06 Kawnpui - Sairang kawng siam mek chu nimin khan an enfiah leh. Kawng enfiahnaah hian ZPM Ṭhalai vice president Isaac Lallungawia Rokhum hoin hruaitu eng emaw zat an tel a; kawng siam chin chu a ṭha thawkhata an hriat thu an sawi rualin, ṭha tak leh rintlak taka thawk zel turin kawng siamtute an chah a ni.

Ruihhlo ngai camping

Khawzawl district bawrhsap K Vanlalṭhiana hoin nimin khan DC auditorium-ah Khawzawl District Level Task Force on Ruihhlo Do hruaitute leh Kohhran hrang hrang bial hruaituten ruihhlo ngaite enkawl dan tur an sawiho a; ruihhlo ngaite tan camping buatsaih an rel. Camping atan hian Health department, SP office, kohhran hrang hrang leh YMA mawhphurhna turte ruahman a ni.

Tuizemah tla hlum

Blessing Lalmalsawma (3), Saiphai chu February 25, Nilaini chhun dar 12:30 vel khan an ṭhenawmte tuizem (tanky) ah a tla hlum a, nimin chhun khan vuiliam a ni. Blessing Lalmalsawma hi an ṭhenawmte inah a leng a, a hnuah a lenna bul tanky chung rangvaa khuh chunga naupang infiamna an pho ro lak a tumna lamah tanky-ah hian a tla nia rin a ni.

Vawk vulh ṭanpuina

AMC Ward-VIII corporator Christina Roluahpuii Sailo chuan a ward chhunga vawk vulh duh, danin a phal china vulhna tur hmun neite tan NE Region Community Resource Management Society hnuaiah chhungkaw 18 tan cheng nuai 40 a hmuh chhuahsak tawh.