Leivungin Tlawng lui a thlen loh nan hma la dawn

Aizawl District Disaster Management Authority chairman Lalhriatpuia, district bawrhsap kaihhruaiin sorkar department hrang hrang aiawh telna 'Joint Mitigation Team' chuan February 24, 2026 khan Aizawl khawpui hel (bypass)-na tur Sihhmui - Muallungthu panna kawng laih mekin Tlawng lui a tibawlhhlawh nia sawi chu a hmunah an enfiah a; leivung hian km 2 chuangin Tlawng lui a la thleng lo tih finfiah niin, fur ruahin Tlawng luia leivung a len thlak loh nana hmalak dan tur an sawiho nghal.

Sorkar thuchhuah tarlan danin, Joint Mitigation team-te hian kea kal theih lohna bak chu drone hmangin an enfiah a; Muallungthu bula Tuisik lui leh Mauphir luite chu nikum fur lai khan kawng laihna vung hian a chhilh nual tawh tih finfiah niin, Mauphir lui hian Tuisik lui finin, chu chuan Tlawng lui a fin leh a ni. Mauphir luia leivung hian Tuisik lui a la thleng lo tih leh Tuisik luia leivung pawh hian km 2 chuangin Tlawng lui a la thleng lo a; leivung emaw, chhirh hnuhma hmuh a ni lo.

Hetiang hi tun dinhmun ni mah se, furpui lo thleng turin Tlawng luia leivung a lenthlak loh nan a danna tur ruahmanna tlangpui a hmunah sawiho nghal a ni a; ruahmanna kimchang zawk siam turin a ṭul anga drone hmanga zirchianna neih leh a, ṭhutkhawm leh ni se, an ti. Tlawng lui hi Aizawl tui lakna ber a nih avangin department dangte pawh a ṭul dan ang zela thawhko tur leh infinchhuah zel turin DC chuan a ngen nghal bawk.