April 2021-ah HSLC leh HSSLC exam

School Education minister Lalchhandam Ralte chuan, High School Leaving Certificate (HSLC) leh Higher Secondary School Leaving Certificate (HSSLC) examination chu April 2021-ah neih a nih dawn thu a sawi.

January 12, Thawhlehnia Edenthar Comprehensive School a hawnnaah thu sawiin Education Minister chuan, HSLC 2021 result chu kumin June thla chawlhkar hmasa berah leh HSSLC 2021 result chu June thla chawlhkar hnihnaah tihchhuah tum a nih thu a sawi a, "Pawl 1-9 leh pawl 11-te chu an páwl sawn ngawt loin bridge course siam tum a ni," a ti.

Lalchhandama Ralte chuan, Covid-19 hri léng chu zirnain a tuar nasa ber nia sawiin, "Zirlaite'n sikul kal an châk tawh a, zirtirtute'n naupang zirtir hna chhunzawm ṭul an ti em em tawh a, private school-te'n an tuar hle bawk a ni," a ti a; zirlaite'n an thiam tur ang an thiam loh sorkarin a hlauh avangin online hmang te, TV leh a theih ang ang hmanrua hmangin zirtirna hna kalpui mek a nih thu sawiin, chu'ngte chu an fate ngaihvenpui turin nu leh pate a chah.

School Education Minister chuan, khawtlangin hma a sâwn dawn chuan zirnaah bul ṭan a ngaih thu sawiin, "Hei hi number 1-ah dah a ngai. Khawtlang hruaitute hian infiamna mual chauh thlir loin, zirna an dah pawimawh zel hi veng hmasawnna tak tak tur a ni a, zirna lama thawktute thawhpui leh ṭan rual a pawimawh hle a ni," a ti.

Edenthar Comprehensive School hawnna hi Edenthar Veng Local Council Chairman-in a kaihruai a, bialtu MLA C Lalmuanpuia pawhin thu a sawi. School Education director James Lalrinchhana leh a thawhpui te, Edenthar Veng khawtlang hruaitute leh sikula thawkte an tel a ni.