Retheia tu mah an awm lohna turin Leilung hausakna hâi chhuah kan tum - Chief Minister

Zaingen YMA Hall-a inkhawmah Chief Minister chuan, "State pum hmasawn theihna turin chhung tinin thawh chhuah ṭha tak an neih a, retheia tu mah an awm loh nan ram leilung hausakna hâi chhuah tum a ni. Covid-19 avangin chak takin hmalak theih rih loh mah se, tunah vaccine pek bul ṭan turin ram a inpuahchah tawh a, beiseina êng nen chak taka hmalak thuai beisei a ni," a ti.

Zoramthanga chuan, theihna leh thiamna zawng zawng sáwm khawma hna an thawh tlân chuan malsawmna an hâi chhuak ngei dawn tih sawiin, thawhpuiah mipui a sáwm a ni.

CM Zoramthanga chuan, ram ṭhang zelah mamawh a pung a, a danglam zel dawn tih sawiin, "Myanmar ram nena inthlun zawmna tur kawng siam mek hi nakin lawkah lirthei lian tam takin an la zawh ang a, khua a ṭhan zel dan tur thlir lâwkin, in district tihhmasawn zelna turah fing tak leh rilru inhawng takin ngaihtuahna hmang thiam ang che u," a ti.

DC office complex chu sorkar department hrang hrangin headquarters-a an neiha an awm khawm theihna tur a nih thu sawiin CM chuan, "Sorkar office hrang hrang dawr turte'n hmun leh hmuna awlsam taka an dàwr theihna tura ruahman a ni," a ti a; Covid-19 avangin sorkarin sum nei tam thei rih lo mah se, DC complex atan cheng nuai 1000 pek sa a nih thu a sawi.

Bialtu MLA Tawnluia, deputy chief minister pawhin thu sawiin, Khawzawl district tihchangtlunna tura sorkar hmalaknaah district mipui an lawm niin a sawi a, "UDPA, Revenue, Education leh a dangte'n district office an hawn bakah, divisional leh sub-divisional office-te pawh district office-ah hláng kaiin, department dang pawhin district office hawng turin hma an la zel a ni," a ti.

Hawnna inkhawmah hian minister of state Robert Romawia Royte, Horticulture Department Board vice chairman F Lalnunmawia, MLA leh Khawzawl DC Zothanmawia te pawhin thu an sawi a ni.