CYMA hruaitute'n kawng siam an enfiah

Central YMA hruaitute chu Mizoram hmun hrang hranga kawng siam mekte enfiah turin nimin zing khan Aizawl aṭangin an thawk chhuak.

Mizoram chhunga kawngpui siamte ṭha leh rintlak a nih theih nan CYMA chuan June 14, 2018 khan Mizoram PWD chu thuthlung a lo ziahpui tawh a; chumi bawhzui chuan CYMA hruaitute chuan Mizorama kawngpui siam mekte enfiah an rel a, nimin zing dar 6:30 khan CYMA Office aṭangin an chhuak a ni.

CYMA president Vanlalruata leh CEC member pahnihte'n Ngaizawl -Tualpui kawng, vice president Lalhmachhuana leh CEC member pathumte'n Bairabi-Meidum-Zero Point-Vairengte kawng, assistant secretary Prof. Malsawmliana leh CEC member pathumte'n Sialsuk-Sailam kawng, treasurer Fabian Lalfakawma leh CEC member palite'n North Vanlaiphai kawng, finance secretary Roneihthanga leh CEC member pathumte'n Phullen kawngte an enfiah dawn a ni. 

CYMA chuan, Mizorama inkalpawhna kawng siam mekte chu a thawktu tura thlan contractor-te ngeiin thawkin, hun tiam ral hma ngeia an thawh zawh chu YMA duh dan a ni tih an tarlang a, "Kawng ṭha nei turin YMA chuan theihtawpin hma a la zel dawn a ni," an ti.

Kawngpui siamna lama thuneitute leh hna thawktute chu ram ro tling ngei tura hna thawk tur leh dik leh fel taka hma la turin CYMA chuan an ngen a; kawng ṭha nei turin thâ thlah loa ṭang zel turin YMA sub-headquarters, group leh branch-te an ngen bawk.CYMA chuan, nun khawchhuahna atan inkalpawhna kawngpui ṭha a pawimawh thu sawiin, kawngpui ṭha neih a nih theih nana hmalak chu YMA General Conference 2017-ah an rêl tawh thu an sawi a, "Kan rama kawng laih hnate thawktu tura thlan leh tling ni lote'n an thawh avanga harsatna kan tawh mekte sutkian leh kawng ṭha neih hi YMA duh dan a ni. Hna thawk tura thlante'n an thlan chhan ang ngeia thawk tur leh mi dang hming hawha hna thawk ṭhinte chu inthiar fihlîm turin kan ngen a ni," an ti.

Central YMA chuan, hnate chu thawh zawh hun tiam awm sa chhunga thawk zo hman tura ṭan la turin thawktute an ngen a; hna thawhna tura sum dah ennawn a siamṭhat fo chu ṭha an tih loh thu sawiin, kawng siamna tur sumte a hmanna tur dik taka hman a nih theih nan ṭang tlang turin mipui an ngen bawk.