Lo hâl hun hnuhnung March 15, 2021

Environment, Forest and Climate Change (EFCC) minister TJ Lalnuntluanga kaihhruaiin nimin khan PCCF conference hall-ah State Level Sub Committee on Fire Prevention an ṭhukhawm a; kumina lo hâl hun hnuhnung atan March 15, 2021 an ruat.

Ṭhutkhawmnaah hian, kângmei vên hapta, Fire Prevention Week chu February 8-13, 2021 chhunga hman turin a rél a; March 15, 2021 aia tlai loah lo hâl vek tur leh Lengpui Airport chhehvel khuate chu chawhnu dar 3 hnuah chauh lo/huan hâl tura hriattir ni se, an ti.

Tarlan danin, kum 2020 khan mei kawng (fireline) thar km. 130-a thui sial a ni a, a hma kuma mei kawng sial tawh km. 130 vel tihfai/sial ṭhat a ni bawk. Fire watcher mi 150 thla li chhung rawih a ni.

Lo hâl hun hnuhnung March 15, 2021

Kum 2020-ah hripui léng avangin lo neih tum lêm lo, tlai khawhnua lo vât chawp leh chul rît an tam a, lo hâl hun bituk zawm hleih theih a ni lo. Ram kâng a hmuna endik chin (70% vel) report aṭangin Mizorama kângmei chhuak zat chu (lo/huan hâl tiamin) hmun 1,300-ah ram hectare 3,614-a zau a ni a; chu'ng zinga hmun 210-a hectare 289-a zau chu ram kâng (forest fire) niin, hmun 1,090-a hectare 3,325-a zau kâng chu lo hâl, cha hâl (debris buring), bawlhhlawh hâl leh kângmei chhuakte a ni.