Notified town-a periodic patta dilah Sorkar thutlukna ngaihchàn a ni

Mi eng emaw zatin Kolasib district chhunga notified town-a periodic patta an dil chungchangah district thuneitute chuan sorkar thutlukna an ngaichâng.

Kolasib (Thingdawl), Kawnpui leh Bilkhawthlir notified town huam chhungah mi eng emaw zatin Kolasib Settlement Office-a periodic patta an dil chungchang chu January 12, Thawhlehni khan Kolasib DC Dr H Lalthlangliana hoin ngaihtuah a ni a, Aizawl aṭang pawhin Land Revenue & Settlement (LRS) department hotute an tel.

Thu dawn danin, DC hoa ṭhukhawm chuan hmalak zui dan turah sorkar ràwn ni se, an ti a, an thutlukna bawhzuiin sorkarah lehkha an thawn nghal. Sorkar thutlukna angin hmalak zui a ni ang.

Kolasib-a Settlement Office chuan tun hnai khan NH-306 chu four lane-a zauh turah an enfiah (survey) mek a; a paltlang tura ngaihah periodic patta dilna 165 an dawng a ni.

Hetih lai hian, Mizoram Land Revenue Laws-ah chuan, notified town-ah periodic patta pek theih a ni lo a (Chapter-V Section 34); periodic patta chu agriculture atan chauh, notified town area páwnah pek theih a nih thu tarlan a ni.

Periodic patta hi Kawnpui town area-ah mi 130, Kolasib town (Thingdawl) area-ah mi 19 leh Bilkhawthlir town area-ah mi 16-in an dil a; a diltu tam zawk chu Aizawl mi an nia thu dawn a ni.