Hmahruaitu Reds hmaah a hniam ber Norwich

Liverpool chuan zanin dar 11:00-ah Premier League match an khel dawn a, table mawngphah luahtu Norwich City an lenchilh dawn. 

August 2019 khan team pahnih hi tun season-a Premier League match hmasa ber ni turin an intawng a, Reds-in 4-1 in hnehna an chang. Teemu Pukki kan hmelhriatna inkhel a ni nghal bawk. 

Goal li teh meuh khungtu Liverpool an hawikir leh tawh lo a, tunah chuan league-ah point 22 ngawtin hma an hruai fal tawh - an champion chiang tawhah a sawi theih a, Norwich erawhin an 'nunna' tura an beih a ngai thung.

Club lian zingah Tottenham Hotspur chu Pathianni zan dar 7:30-ah an inlan dawn bawk a, Champions League khelh tum club hian Aston Villa chu khualmualah an lenchilh ang. 

Jurgen Klopp-a naute tan hmabak a hautak a, Champions League khelh kar a nih dawn avangin Norwich lakah eng ang takin nge an rawn inremkhawm dawn tih chu hmuh châkawm a ni. 

Liverpool hian Thawhlehni zan dar 1:30-ah Champions League last 16 first leg khel turin Atletico Madrid an lenchilh dawn a, Spanish club-in tun season-ah beisei phak lo mah se engtiklai mahin tum châkawm an ni ngai lo. 

Klopp chuan, "Tih ṭhat loh ṭum chuan CL hi chawlh hahdamna hun a ni thei a, tunah erawh a ni lo. Team tum hautak ber pawl Atletico kan hmachhawn dawn a, tuna buaina tur erawh a ni lo. Norwich zawhah CL chu kan ngaihtuah ang," a ti. 

German coach thusawi aṭanga teh chuan zaninah players ṭha an khel a nih pawhin a mak lo ang. Klopp hian Sadio Mane leh James Milner an dam ṭhat leh tawh thu a sawi a, Xherdan Shaqiri erawh chhawr theih a ni dawn lo. 

League match 25 khelh tawhah Liverpool an la tlawm lo a, Klopp-a'n record duhawm neia tlawm nei miah lo chunga nomawi chawi a duh dawn tih chu thil chiang a ni. Hei vang hian German coach a fimkhur a, 4-1 a an sawp hnu team lakah tih mai mai a tum lo. 

Klopp chuan, "Mipuite chuan table ringawt an en a, a awlsam turah an ngai a ni. Kan tan erawh match kan khelh tura pawimawh ber a ni a, a awlsam dawn lo," a ti a, match tin a ngaih pawimawh dan a inan thu a sawi. 

Borussia Dortmund boss hlui chuan sawi zawmin, "Hlawhtling tur chuan chak zel a ngai a, engmah a la chiang lo. Mahse, tun ang renga buaina duhawm a awm chuang lo," a ti a, an dinhmun a ṭhat thu a pha lo. 

Norwich lamin match thum hrem vanga inlan tawh lo Ben Godfrey an chhawr thei leh tawh dawn a, league match 23-a goal 11 khung tawh Teemu Pukki hi innghahna tur a ni bawk ang. 

Tottenham-in Aston Villa an lenchilh dawn a, player inhliam Moussa Sissoko, Giovani Lo Celso, Erik Lamela leh Ben Davies ten dam lam an pan avangin chanchin lawmawm an nei. 

Hetihrual hian Spurs hian Reds ang thoin Champions League match an nei dawn a, Nilaini zanah round of 16 khel turin RB Leipzig an 

mikhual dawn. 

Jose Mourinho tan season thara Champions League khel turin Villa lakah hnehna chan ngei a ṭul a, Leipzig ngaihtuah tel nen Portuguese coach hi a buai khawp ang. 

Hetihrual hian Chelsea-a a lo enkawl tawh John Terry chu Villa tan assistant manager a ni mek a, "Ka hrawn tawh coach-a ṭha ber a ni," tia Mourinho faktu hian a pu hlui chak lohna thlengin a hria ang tih hriat tel a ṭha.