Vawiinah Covid-19 vaccine dawn beisei

Covid-19 laka invênna damdawi (vaccine) Covishield chu vawiin hian Mizoramah phurh thlen beisei a ni a, January 16, Inrinniah damlo enkawlna hmuna thawk (healthcare worker)-te hnenah pek ṭan a ni ang.

COVID-19 Vaccination Drive thupuangtu Dr Lalzawmi hnen aṭanga Vanglaini-in thu a dawn danin, Covishield hi nimin khan Pune aṭangin rawn thlen beisei a ni a, chuvang chuan lo dawngsawnga buaipuitu turte pawh Lengpui Airport-ah tirh an ni tawh a, thlawhtheihnaah buaina eng emaw a awm avangin a rawn thleng thei lo.

A rang lamin Mizoramah Covishield a rawn thlen theih nan hmalak chhunzawm nghal a ni a, vawiin hian Pune aṭangin Aizawlah (Pune-Kolkata, Kolkata-Aizawl) phurh thlen theih beisei a ni. Covishield hi a siamna hmun aṭanga ni khat chhung ngeiin a hmanna tur state thlenpui tura tih a nih avangin thlawhtheihna remchan dan zawn a ngai a, chuvang chuan Civil Aviation Ministry nen inbiak a ni.

Covishield vawiina rawn thleng tura beisei chu dose 18,500 a ni a, mi pakhatin dose hnih zel an lâk a ngai. Chhan eng emaw avanga hman theih loh a awm theih avangin dose rawn thleng aṭanga 10% zel chu sorkar laipui remruat angin hman theih loh tura chhut tur a ni a; chuvang chuan, a rawn thleng hmasa ber tur chu mi 9,000 vel hnena pek a ni ang.

Dr Lalzawmi chuan, Covid-19 vaccine pek dan turah ruahmanna peih vek a ni tawh tih a sawi a, "Vaccine rawn thlen dan azir zelin a indawtin pek a ni ang," a ti.

Mizoramah chuan healthcare worker-te'n vaccine an dawng hmasa dawn a, dawng hmasa turin database-ah mi 14,421 thun luh tawh a ni a; chu'ngte chu Mizoram sorkar hnuaia healthcare worker mi 14,107 leh sorkar laipui hnuaia healthcare worker mi 314 an ni.

Mi 14,421 zingah hian doctor leh nurse bakah, damdawi-ina thawktu hrang hrangte leh ambulance driver-te an tel a; January thlaa ni 9 chhungin Mizoramah ni tin mi 880 hnenah pek tura ruahman a ni.