COVID-19: Mizoram dinhmun Hripui vei mi 4 hmuh belh a ni

January 12, Thawh-lehni khan Mizoramah Covid-19 vei mi pali hmuh chhuah a ni a, an zingah tualchhunga kái pakhat a awm a, natna (symptom) lang lo vek an ni. Nimin khan tlai dar 5 thlengin hripui laka fihlîm tawh chhuahtir an awm lo.

Covid-19 vei Thawhlehnia hmuh chhuahte chu TrueNAT-PCR hmanga hmuh chhuah mi pathum leh  Rapid Antigen Test (RAT) hmanga hmuh mi pakhat an ni a; ZMC laboratory-ah hmuh chhuah a ni lo thung.

Mizorama Covid-19 vei hmuh chhuah tawh chu mi 4,303 an ni a, mipa 3,156 leh hmeichhia 1,147 an ni. Nimin tlai dar 5 thleng khan damin mi 4,200 (97.61%) chhuahtir an ni tawh a, mi pakua (0.21%) thi tawhin, enkawl mek mi 94 (2.18%) an awm.

January 12, Thawhṭanni khan ZMC laboratory-ah swab sample 344, TrueNAT-PCR hmangin district pasarihah sample 100 leh RAT hmangin district pariatah sample 634 endik a ni a; sample endik zawng zawng chu 1,078 niin, chuta ṭanga Covid-19 vei hmuh chhuah mi pali chu 0.37% a ni.

Mizoramah swab sample 1,89,178 endik a ni tawh a, chu'ng aṭang chuan Covid-19 positive mi 4,303 hmuh chhuah niin, endik zat aṭangin 2.27% a tling.

Covid-19 vei hmuh chhuah tawh mi 4,303 zinga mi 2,039 chu Mizoram chhunga kái chhâwng an ni a; mi 2,264 chu Mizoram páwn aṭanga an rawn luh hnua hmuh chhuah an ni.

Mizorama district 11 zinga panga - Siaha, Champhai, Serchhip, Mamit leh Hnahthial district-ahte Covid-19 vei an awm rih lo.

TrueNAT-PCR-a hmuh:

BSF, Lunglei - 1: Melte, Lungleia awm 131 Bn BSF sipai kum 42, tun hnaia Uttarakhand aṭanga rawn lut, quarantine facility-a awm mek, symptom nei lo.

North Hlimen - 1: Mipa kum 31, tun hnaia Manipur aṭanga rawn lut, quarantine facility-a khung hran lai, symptom nei lo.

Khawzawl Dinthar - 1: Mipa kum 45, Shillong aṭanga tun hnaia rawn haw, quarantine centre-a awm mek, symptom nei lo.

RAT hmanga hmuh:

Puankhai - 1: Mipa kum 37, a chêtsual vanga Aizawla mimal damdawi-ina kal, endiknaa +ve tih hmuh chhuah; tualchhunga hri kái, kàina hriat loh, symptom nei lo. Puankhai hi Lunglei district ni mah se, Aizawla sample lak leh endik a nih avangin Aizawl district case-ah ziah luh a ni.

Mizoram pawn    58    1 (GMC)

ZMC laboratory    9,4024    2,611

TrueNAT-PCR    17,269    663

RAT    77,845    1,028

BELHKHAWM    1,89,178    4,303