KHAWTHLIR

Resolution hnâwl

Nimin khan Assembly session-ah INC member C Ngunlianchunga private member resolution put luh, ‘Mizo ten hmeichhia tia kan koh ṭhin na hi ‘Mi nu’ tia thlak ni rawh se’ tih chu sawiho a ni a, hnâwl a ni.

LS MP-in kâwm

Lok Sabha MP Richard Vanlalhmangaiha chuan nimin khan NEEPCO leh NTPC chairman Gurdeep Singh chu Delhi-a a pisaah a kâwm a; Tuirial HEP aṭanga kawlphetha siam chhuah hlêp aṭanga CSR an hman thin chu Mizoramah ngei hmang tur leh, hmun dang aṭanga an CSR-te pawh Mizoramah hmang ṭhin turin a ngen. Gurdeep Singh chuan, hma a lo lak tur thuin a chháng a; Mizoram sorkarin a hun takah power bill an pek ṭhin tawh avangin an lawm thu a sawi bawk.

Kawng khar

Traffic SP C Vanlalvena chuan hriattirna chhuahin, Ramhlun Venglaia District Industry Centre ramah nimin aṭang khan kawng laih zauh a nih avangin, hna thawh zawh hma chu zan dar 9 aṭanga zing dar 5 inkarah Tlaklui - Sihpui Road, Industry peng, Ramhlun Venglai aṭanga Sihpui inkar kawng khâr a nih dawn thu a tarlang.

A huna zawh tum

PHE minister Prof. Lalnilawma chuan nimin khan ZPM member T Lalhlimpuia zawhna chhangin, SASCI hnuaia Upgradation of Greater Water Supply Scheme (Pumping and Distribution System) chu zawh hun tura ruatah zawh ngei tum a nih thu a sawi.

Outreach programme

Ministry of Information & Broadcasting hnuaia Central Bureau of Communication (CBC), Aizawl Field Office chuan nimin khan Chawlhhmuna Social Amelioration Society (DDU-GKY)-ah thawktute leh zirlaite pualin 'Special outreach programme on Nari Shakti & Viksit Bharat @ 2047' an buatsaih a, CBC head Dr Rajeev Lourembam-a'n a hmanpui. Aizawl North College-a assistant professor Jerry Lalmuansanga'n thil pawimawhte a hrilhfiah a ni.

Lo hâl hun pawtsei

Kolasib district magistrate Robert C Lalhmangaiha chuan hriattirna chhuahin, hmunphiah, hmarcha leh sawhthing chingtute tan March 31, 2026 thleng lo hâl hun pawhsei a nih thu a tarlang a, "March 15 hmaa lo hâl vek tur tia thupek chhuah tawh chu Handholding hnuaia hmunphiah, hmarcha leh sawhthing chingtute tan March 31, 2026 thleng pawhsei a ni," a ti.

Road safety inzirtir

Khawzawl District Road Safety Committee chuan nimin khan lirtheia eizawngtu pawl hrang hrangte pualin Khawzawl Zaingen Branch YMA Hall-ah Road Safety Month 2026 pualin 'Awareness on Road Safety' an buatsaih. Inzirtirnaah hian Police, Transport department leh YMA Sub-Headquarters hotute'n thil pawimawhte an hrilhfiah a ni.

Lungleiah KISAN MELA

Lunglei District Agriculture Technology Management Agency (ATMA) chuan nimin khan Lunglei Agriculture Complex-ah 'Kut Hnathawktute Kûtpui (Kisan Mela) an buatsaih a, Agriculture & Farmers Welfare secretary Ramdinliani'n a hawng a, vawiinah chhunzawma zawh a ni ang. Agriculture, ATMA, Horticulture, AH&Vety, Fisheries, Soil & Water Conservation, Sericulture, Lunglei KVK, ICAR, MzSRLM, NEIDA, SELCO Foundation, Jute Corporation of India, Cadbury leh tualchhung mi kut hnathawktu te, thil siam chhuaktu leh loneihna hmanraw zuartute an inpho chhuak a ni.