Tourist lodge sak belh vak kan tum lo - Tourism Minister

Tourism minister Lalnghinglova Hmar chuan tourist lodge sak belh vak vak an tum loh thu nimin khan Assembly session-ah a sawi a, "Kan neih sate pawh privatise leh outsource lam uar kan tum," a ti.

ZPM member H Ginzalala zawhna chhangin Tourism Minister chuan, tourist lodge hmun tam takah sak a nih thu a sawi a, "Hmun ṭhenkhatahte chuan thleng an awm ngai mang lo. A enkawltu tur rawihna a ngai a, a thawh chhuah leh a lak luh a inmil lo. Sum la lut tura ngaih kan nih laiin, kan hek zawk," a ti a, thawh chhuah leh sum nen a inmil loh avangin outsource leh privatise uar tum a nih thu a sawi.

Lalnghinglova Hmar chuan, khualzinte thlen tamna tourist lodge-te chu chei ṭhat tum a nih thu sawiin, "Hmun pawimawh bik, mi tlawh tamna hmunahte chuan din belh lam pawh kan ngai pawimawh," a ti.

MNF member K Hrahmo zawhna chhangin Lalnghinglova Hmar chuan, Mara Autonomous District Council huam chhunga tourist lodge-te chu MADC enkawltir tura hma an lak thu a sawi.

Tourism Minister chuan, Chaltlanga Tourist Lodge enkawl turin Hotel Apollo thlan a nih thu a sawi a, "Anni nena hlan tur hian Law department-in an pawm tawh a, Finance department lamin siamṭhat duh an nei a, siamṭhat mek a ni. March thlaah hi chuan kan inhlan hman kan beisei. Hotel changkang tak din tum a ni," a ti.

Hnahsin Kût chungchangah Lalnghinglova chuan, "A buatsaihtute sorkarin a pui ṭhin a, nikum pawh khan Bâna Kaih scheme leh department dang aṭangin cheng nuai 30 chuanga puih a ni. A buatsaihtute hian sorkar nena tiho ṭha an ti a, inbiaknate neih a ni," a ti a, sorkarin puih zel a tum thu a sawi.