National Science Day hman a ni

Mizoram Science, Technology & Innovation Council (MISTIC) bultumin nimin khan Dawrpui Multipurpose Hall-ah National Science Day hman a ni a, Planning secretary Lalmalsawma Pachuau-in a hmanpui. National Science Day hi February 28 a ni a, Inrinni a nih avangin nimin khan hman a ni.

Lalmalsawma Pachuau chuan, Science & Technology-a thawktute chu ram hmasawnna innghahna pawimawh an nih thu sawiin, "India ramin ram hmasawn leh intodelh ‘Viksht Bharat’ nih tuma ṭan a lak meknaah a kila lung ṭangkai berte chu science mite an ni. Mizoramah pawh ram hmasawnna atan Science & Technology department-in nasa takin hma an la a, Mizoramin ei leh bara intodelhna kawnga hma a lakna atan thil pawimawh tak a ni," a ti.

National Science Day puala inkhawmah hian Mizoram Science Centre curator Dr Lalrinkimi'n hmeichhiate’n science lama hma an sawn dan leh Mizo hmeichhe hlawhtlingte a tarlang a; NIT (Academics) dean Sukanta Roy, scientific officer Dr Lalchhandami Tochhawng leh Lalchhuanmawia ten thil pawimawhte an sawi.

Chawhnu lamah scientist, professor leh entrepreneur ten thupui hrang hrang zirhona an nei a; thil siam chhuaktute leh zirlaite tan inpho chhuahna hun buatsaih a ni bawk.