Sa sâwngbâwl dan inzirtir

Animal Husbandry & Veterinary department leh ICAR-NMRI, Hyderabad chuan nimin khan State Veterinary Polyclinic Hospital conference hall-ah vawk leh ar vulhtute pualin sa sâwngbâwl dan leh hlâwk zawk tura buaipui dan zirhona an buatsaih.

'Meat processing and value addition technologies relevant to North-Eastern India' tih thupui zirhonaah hian PIGFED member vawk vulhtu mi 15 leh Chhimphei Womens Poultry Producers Company Limited member mi 16 an tel a; AH&Vety deputy director (VEE) Dr Lalfamkima'n kaihruaiin, director Dr Lalrotluanga Sailo-in a hmanpui. Training-a telte hnenah ran damdawi sem a ni.

ICAR-NRMI principal scientist Dr Suresh K Devatkal, Selesih AH&Vety Farm manager Dr Lalrengpuii Sailo leh Durtlang veterinary officer Dr C Lalnunpuia ten ran vulhtute chu ar leh vawk vulh chu eizawnna tlak a nih dan te, awmze nei zawka sa sâwngbâwl dan leh dahṭhat dan te, thianghlim taka ran talh dan leh sa aṭanga ei tur tui hnai zawk siam dante an zirtir a ni.