KHAWTHLIR

Aizawl bawrhsap R Lalramnghaka hoin nimin khan sorkar department hotute'n kumina Republic Day lawm dan tur sawiho a ni. General Administration Department-in kaihhruaina a siam angin, Republic Day hi parade leh sikul naupang tel loa lawm tum a ni a; tel turin sorkar hnathawk joint secretary leh a chung lamte sáwm an ni ang.

Champhai District Magistrate chuan January 12, 2021 khan CrPC Section 144 hmanga thupek chhuahin, Champhai leh Tualcheng/Vaikhawtlang inkar kawngah kuhva phur lirthei rêng rêng tlân khap a nih thu a puang. Thupek hian January 12, Thawhlehni aṭanga thla hnih chhung a huam ang.

MHIP General Headquarters pisa chu nimin khan kumin chhung atan hawn ṭan a ni. Pisa hawnna inkhawm neih a ni a, MHIP president Lalthlamuani'n kaihruaiin, vice president Saipuii'n fuihna thu a sawi.

Excise & Narcotics department hnuaia Anti Narcotics Squad chuan January 12, Thawhlehni chhun dar 12:30 khan Durtlang Leitanah heroin gram 284 (hawng 22) leh a neitua puh - Laltlanmawii (45) d/o Sailianthanga, Zokhawthar leh Vanlalhriati (29) d/o Thanseia, Darlawn Venghlun (Durtlang Leitana khawsa mek) nia inchhálte an man. 

PC pisa hawng

People Conference (PC) party chuan an pisa chu nimin khan kum 2021 chhung atan an hawng ṭan. Hawnna inkhawmah PC senior vice president Vanlalruata chuan, PC party-in Mizoramah voter 60,000 vel an neih mek thu sawiin, "MLA inthlan lo awm leh hunah PC party kan sorkar thei a ni," a ti.

Laldingliana Sailo lehkhabu ziah, 'Lungleng lal Khamliana Sailo' tih chu nimin khan Health minister Dr R Lalthangliana'n a pisaah a tlangzarh. Lehkhabu hi phek 270-a chhah a ni.