KHAWTHLIR

Thisen pe

February 28, Inrinni khan Bethlehem Vengthlang Branch YMA chuan ZMCH tan thisen unit 45 an pe a, petute mipa 26 leh hmeichhia 19 an ni. PYD (NEI), Rangte Section pawhin Lunglei Civil Hospital tan thisen unit 32 an pe a, petute mipa 24 leh hmeichhia pariat an ni.

Upate Kût hmang

Lungleia Social Welfare office leh Mizo Upa Pawl General Headquarters, Lunglei chuan February 27, 2026 khan Saikuti Hall-ah Upate Kût an buatsaih. Kûtah hian mithiamten hriselna, ei leh in ṭha leh mahnia insawizawi dan te an zirtir a, ALIMCO PMDK Aizawl aṭangin upate puitu hmanraw hrang hrang sem a ni bawk.

SMILE hmalakna

Lunglei District Committee on SMILE chuan tun hnai khan sorkar laipui hnuaia kutdawhte dinhmun siamṭhatna tur, 'Support for Marginalised Individuals for Livelihood and Enterprise' (SMILE) kalpui tura hmalakna an thlirho. SMILE implementing agency atan Lunglei TNT an thlang a, bul ṭan nan Bazar Veng, Chanmari, Electric Veng leh Venglaiahte kutdawh awm zat zir chiang an rêl bawk.

Health assessment Camp buatsaih

Lunglei district-a vohbikte chawikanna tura ruahman, Project LEAP (Lunglei's Empowerment for Access and Equity for all Persons) hnuaiah February 27, 2026 khan Tlabung Sub-Divisional Hospital leh Tuichawngah vohbikte hriselna dinhmun endikna, Health Assessment Camp buatsaih a ni. Tlabung RD Block chhung khaw hrang hrang aṭangin vohbik mi 82 dinhmun endik a ni a, UDID card nei thei mi 68 chu card siamsak turin UDID portal-ah thun nghal an ni.

Kumpuan hawng

Serchhip district bawrhsap Paul L Khuma chuan February 27, 2026 zan khan Serchhip Sub-Headquarters YMA buatsaihin YMA kumpuan 'Ruihhlo do' a hawng. Bawrhsap chuan, "Ruihhlo do kawngah awmze nei zawka hma la thei tur chuan ruihhlo chu eng nge a nih a, mihringah engtinnge hna a thawh tih kan hriat chian a, kan zir chian a ngai a ni," a ti.

June 2025 thleng upa lawmman pe fel

INC member C Ngunlianchunga zawhna ziaka chhangin Social Welfare minister Lalrinpuii chuan, old age pension (upa lawmman) June, 2025 thleng pek fel a ni tawh tih a tarlang. Social Welfare Minister chuan, "June, 2025 thleng bak central sorkarin pawisa a la release loh avangin pek tlak theih a ni rih lo. State contribution tur erawh hi chu budget-ah kan dahfel vek a, pawisa kan nei reng a ni," a ti.

SBI branch thar

State Bank of India chairman CS Setty chuan Sakawrdaia SBI branch an din thar chu February 27, 2026 khan video conferencing kaltlangin Guwahati aṭangin a hawng. SBI Sakawrdai Branch hawn thar hi Mizorama SBI branch 53-na a ni a; a hawnnaah hian Sakawrdai khawtlang hruaitute an tel a ni.