Aizawl leh a chhehvela khualzinte tlawh ṭhin hmunte chei ṭhat tum a ni

Tourism minister Lalnghinglova Hmar chuan February 28, Inrinni khan Aizawl leh a chhehvela khualzinte'n an tlawh ṭhin hmunte a tlawh a; khualzinte tlawh tam hmunte chu khuarel mawina tichhe lo thei ang bera chei ṭhat tum a nih thu a sawi.

Tourism Minister-in a tlawhte chu - Sakawrhmuituai tlang, Durtlang North, Sakeikhawthlir (Durtlang), Muthi leh Laipuitlang te a ni a; Tourism department hotute'n an ṭawiawm a, khawtlang hruaitute nen hmalak dan turte an sawiho a ni.

Lalnghinglova Hmar chuan, Mizoramah khualzinte hîp theihna hmun ṭha eng emaw zat chu chei ṭhaa tichangtlun turin an ruahma thu a sawi a, "Sorkarin chei ṭhat dan turah ruahman sa deuh nei mah se, a hre chiangtu khawtlang hruaitute rawtna leh duh dante ngaithla a, a ṭha thei ang ber nei tura remruat ho turin kan lo kal a, hmunhmate hi khuarel mawina tichhe lo thei ang bera chei ṭhat tum a ni," a ti.

Hmasawnna ruhrel sak eng emaw zatah a enkawl leh hman dan turah ruahmanna a awm ṭha tawk lo tih sawiin Lalnghinglova chuan, "Infrastructure ṭha tak tak pawh enkawltu mumal awm loa ṭáwl chhia a awm ṭhin. Tuna kan project turah hi chuan a sak lai leh enkawl chhunzawm kawngah khawtlang nen ṭha taka thawhho kan duh," a ti a, ziaka inremna mumal tak neih hmasak an duh thu a sawi.

Sorkar thuchhuah tarlan danin, khualzinte'n an tlawh ṭhin hmunte chei ṭhatna tur hian SASCI Part-II, 2025-2026 hnuaia Development of Tourist facilities & attractions to Global Scale in the state of Mizoram-ah cheng vbc 250 hmuh a ni tawh. Tourist site hrang hranga hmasawnna ruhrel siam bakah, tourist lodge pawimawh bik chei ṭhat te, wildlife sanctuary behchhana wildlife tourism kalpui te, water sports adventure hmun tur siam leh paragliding thlawhna tur siamte a tel a ni.