Lungleia Kisan Mela khâr

Lunglei District Agricultural Technology Management Agency (ATMA)-in Lunglei Agriculture Complex-a ni hnih awh Kisan Mela (Kut Hnathawktute Kût) an buatsaih chu February 28, Inrinni khan khâr a ni a, khârna hun hi Lunglei West bialtu MLA T Lalhlimpuia'n a hmanpui.

T Lalhlimpuia chuan, thlawhhma siam leh a kaihhnawihah Lunglei district-in hmasawn theihna tam tak a neih thu sawiin, "Chumi chu hmang ṭangkaia sâwr chhuak thei turin kut hnathawktute'n kawhhmuh leh kaihhruai an mamawh a, Mizoram sorkarin Chief Minister kaihhruaina hnuaiah ram hmasawnna tur kalkawng duangin, mi taima tana hlawhtlinna tur a ruahman," a ti.

Kut hnathawktute tihhmasawn leh an thar chhuah hmanga ram hmasawnna thlentir chu sorkarin a tum lian tak a nih thu sawiin T Lalhlimpuia chuan, kut hnathawktute chu party induhsakna beisei loa taimakna hmanga sorkar ko eih thei tura hma la turin a chah a; sorkar department leh kut hnathawktute chu Kisan Mela kaltlanga ngaihtuahna thar pu tur leh mithiamte rawn chunga hma la zel turin a chah bawk.

Kisan Mela-ah hian stall 21 a awm a; department hrang hrang hnuaia inpho chhuak zingah kut hnathawktu ṭha thlan niin, 'Best Farmer Award' sem a ni. Lawmman tur sum MLA T Lalhlimpuia'n a tum a, kut hnathawktu mi 12 hnenah Rs 5,000 ṭheuh leh certificate a hlan a ni.

AH & Vety department leh KVK-te'n ran leh thlai hriselna dinhmun endikna (Animal & Plant Health Clinic) an buatsaih bawk a; ran entir 250 vel awmin, ui â hri danna (Anti-Rabies Vaccine) 80 chuang pek a nih bakah, damdawi chi hrang hrang sem a ni.