Serchhip MJA-te'n hnathawh an en

MJA, Serchhip District member-te chuan February 27, Inrinni khan PWD Serchhip Divison hnuaia hmalakna hrang hrang an tlawh a, hnathawhte an en. Serchhip tana ro tling siam tura hna ṭha taka thawk turin thawktu an ngen.

Serchhip MJA member-te hi an president Kapliana Pachuau hoin an thawk chhuak a; hna hrang hrang an tlawha thawktute chu Serchhip tana ro tling siamtu an nih avangin, sorkarin ruahmanna a siam anga a ṭha thei ang bera thawk tura an beisei thu an hrilh a, sorkarin hun bituk a siam chhunga zawh hman tum ngei turin an ngen.

Serchhip Mat phai aṭanga Zote South panna kawng zauh leh siam mek an en hmasa ber a; kawng hi km 14 vela thui a ni. May 14, 2025 khan thawh ṭan niin, kawng laih zauh bik an zo ṭêp tawh a, blacktopping nen March 14, 2027-a zawh hman tura ruahman a ni a, cheng vbc. 21.80 senna tur a ni.

Hna thawktu, Huapzo Construction & Consultancy Services hotute chuan, hun tiam chhunga zawh hman an inbeisei thu an sawi. Zote South mipuite'n an khaw kawng laihna atan zangnadawmna phût loin an ram phal takin an pe tih PWD hotute chuan an sawi bawk.

Serchhip MJA-te chuan cheng vbc 9.63 sênga Serchhip Mat phaia link road leh land development thawh mek pawh an tlawh. He hna hi NABARD sum hmanga thawh a ni a, Zawlpui-Lumtui (km 2), Zawlpui Farm Road (km 1.33), AC Zohmangaiha thlam leh Zokhuma thlam inkar (km 0.5), Zawlpui-Chamdur (km 2) leh Chawmkai-Zuangleng (km 5) te thawh tur a ni.

Hna hi May 3, 2025 khan ṭan a ni a, May 3, 2027-ah zawh tura ruahman ni mah se, tun ṭhâl chhunga zawh hman an tum thu he hna thawktu Evergreen Construction & Consultancy chuan MJA member-te an hrilh. Kawng siam turte hi meter 3-a zauin PCC-a siam tura tih ni mah se, ṭhenkhatah chuan metre 4-a zauin siam a ni.

Serchhip MJA-te hian Bawngchawm tlang panna kawng siam mek te, New Serchhip kawn aṭanga Serchhip Hmarveng panna kawng siam mekte leh Kikawn aṭanga New serchhip panna kawngpui pawh zauh tura ruahmante pawh an tlawh bawk.

Hmar Veng to Kikawn kawng laihna atan hian ram neituten zangnadawmna phut loa ram an pek thu PWD hotute chuan an sawi.