Lunglei Zotlang ramah solar power plant lian ber tur bun tum a ni - Lunglei N MLA

Lunglei High Powered Committee (HPC) vice chairman V Malsawmtluanga, Lunglei North bialtu MLA chuan, sorkarin Lunglei Zotlang ram chhung Zapui ramah Mizorama solar power plant lian ber tur bun a tum thu a sawi.

V Malsawmtluanga hian February 28, Inrinni khan Mizo Upa Pawl (MUP), Zotlang Unit golden jubilee lawmna a hmanpui a; thu sawiin, "Sorkarin Zotlang ram chhung Zapui ramah Mizorama solar power plant lian ber tur bun a tum a, hei hi a taka kalpui theih a nih chuan Mizoram tana Zotlang khawtlangin a thawh ropui tak leh khawtlang hmasawnna tur a ni dawn," a ti a, khawtlang mipui thawhpuina leh ṭawiawmna a ngen.

Mizoram sorkarin upate a ngaih pawimawh thu sawiin V Malsawmtluanga chuan, "Mizoram sorkarin upate chhawmdawlna (old age pension) a tihpun bakah, sorkar laipui aṭanga sum kal a muan ṭhin avangin state sorkarin lo pek lailawk tur state sum dah turin ruahmanna a siam," a ti a; an tu leh fate leh ram leh hnam tana an hlutna te, an ṭawngṭaina leh thurawnin malsawmna a keng tel tih hre reng turin MUP member-te a chah.

V Malsawmtluanga hian MUP Zotlang Unit dintu la dam mi pali - C Kapṭhuama (kum 94), JT Kima (kum 92), R Sumkhuma (kum 88) leh S Kapkima (kum 87)-te hnenah ngaihhlutna thilpek Rs 1,000 ṭheuh a hlan a; MUP Zotlang Unit-in Mizoram hmun pawimawh tlawhna tur an dil angin kum thara MLA Fund hmuh hmasak ber aṭangin ruahmanna siam a nih tur thu a sawi.

MUP, Zotlang Unit hi March 1, 1976 khan din niin, member 216 an awm mek a, March 1 hi Pathianni a nih avangin Inrinni khan jubilee hi an lawm a ni.