Hna chánte tan training buatsaih a ni

Mizoram páwna hna thawk ṭhin Mizo ṭhalai, Covid-19 vanga hna thawk chhunzawm thei lo (returned migrant workers due to Covid-19)-te tan Mizoram Food Processing Research & Training Centre (MFPRTC), Phaibawkkawn, Selingah nimin khan ei leh in tur sawngbawl dan zirna, Entrepreneirship & Skill Development Programme on Home Based Food Processing thawh khatna ṭan a ni.

Mizo ṭhalai, Covid-19 vanga hna chhunzawm thei loa Mizo­rama haw mi 3,000 chuangte'n thawh tur an neih theih nan an eizawnna tur ngaihtuahsak turin Mizoram sorkar chuan North Eastern Council-ah a thlen a, Mizoram Youth Commission-in buaipuiin, kawng chi hrang hrangah training pek turin ruahmanna a siam a ni.

Ei leh in tur sâwngbâwl (food processing) bik chu MFPRTC-ah kalpui a ni a, mi 100 chuang training pek tum niin, a thawh khatnaah hian mi 21 an lut. Training hi Planning department-in a bul an ṭan a; MFPRTC, MZU Incubation Centre, Commerce & Industries department leh LESDE department-te'n zirtir hna thawkin, MYC-in an vil a ni. Kum March thla thleng kalpui a ni ang.