Mizoram House online-a dilna enchhin
Mizoram sorkar chuan nimin aṭang khan online hmanga Mizoram House hrang hranga reservation tih theihna tura duan, Mizoram House Online Reservation Portal (mizoramhouse.mizoram.gov.in) a enchhin ṭan. Enchhinna hi April 2, 2026 thleng neih a ni ang.
Sorkar thuchhuah tarlan danin, Mizoram House Online Reservation Portal enchhin a nih chhung hian India ram hmun hrang hranga Mizoram House-a pindan hauh lâwk duh chuan online portal kaltlangin dilna thehluh tur a ni a; mipui pawhin GAD office leh Mizoram House pan loin, website kaltlangin dilna thehluh tur a ni.
Ruahmanna hi Mizoram House-a room hauh lâwk dan kalphung felfai, langtlang leh mumal zawk a awm theih beiseia siam a ni a; enchhinna a hlawhtlin chuan April 2, 2026-ah official-a kalpui ṭan tura ruahman a ni bawk.