KHAWTHLIR

Mizoram House sak belh tum lo

General Administration department enkawltu chief minister Lalduhoma chuan, Mizoram sorkarin Khanpara, Guwahati-ah hmun nei mah se, tun dinhmunah Guwahati-ah Mizoram House sak belh tumna a awm rih loh thu nimin khan Assembly House a hrilh.

Lehkhabu lehlin ṭha

Mizo Writers Association-in kum 2025 chhunga lehkhabu lehlin ṭha an thlan mekah a ṭha zual pathum an thlang chhuak a; chu'ngte chu - V Zaithanmawia lehlin 'Crossing the Line' tih te, Lalrinzuala Pachuau lehlin 'Khawvela pa hlim ber' tih leh, H Ngurthansanga lehlin 'Second Chance: Israel Narvaez' tihte a ni.

Thutiam sawi rual

Lunglei District Road Safety Committee thuchhuak angin nimin khan Lungleia sorkar hnathawkte chuan an pisa ṭheuhah lirthei khalh chungchanga fimkhur turin thutiam (Road Safety Pledge) an sawi rual. DC pisaa thawkte chuan additional DC Zoramdini kaihhruaiin DC conference hall-ah thutiam an sawi a ni.

MZU-ah zirhona

Mizoram University-a Department of Botany leh ICAR - National Institute for plant Biotechnology (ICAR- NIPB) chuan nimin khan MZU School of Education Seminar Hall-ah 'Food processing and product development for tribal communities/farmers of Mizoram' tih thupui hmangin zirhona an buatsaih. Zirhonaah hian tlang rama kut hnathawktute leh thil siam chhuah lam tui mi 200 vel an tel a, MZU vice chancellor Prof. DC Deka-a'n a hmanpui a ni.

VVP-II sawiho

Lawngtlai District Vibrant Village Programme-II (VVP-II) chuan nimin khan bawrhsap Donny Lalruatsanga kaihhruaiin ramri hrûla khaw awmte chawi kanna tura sorkar laipuiin a ruahman VVP-II, Lawngtlai district-a kalpui dan tur an rêl. Lawngtlai district-a khaw 40 chu VVP-II kalpuina tura thlan niin, khaw pakhat tan kum khatah cheng nuai 300 zel ruahman a ni a; bialtu BDO ṭheuhte'n ruahmanna an siam a ni.