Middle East buaina vanga harsatna tâwkte tana biak tur phone tarlang

Mizo Diaspora Cell chuan thuchhuah siamin, tun hnaia Middle East ram ṭhenkhata buaina chhuakah Mizo harsatna tâwk tan phone number - 8974186240/ 8730970574 leh email - diaspora-cell@mizoram.gov.in ahte biakpawh theih reng a nih thu an tarlang.

Mizo Diaspora Cell chairman Vanlaldina Fanai chuan, Middle East ram ṭhenkhata thil awm dan thlirin, ram eng emaw zat chuan van boruak khuahkhirhna NOTAM (closure of airspace) an puang tih a tarlang a, "Hei hian nasa takin thlawhtheihna thlawk a tikhaihlak a, Ministry of Civil Aviation thuchhuah hnuhnung ber angin, Iran, Israel, Lebanon, Saudi Arabia, Bahrain, Oman, Iraq, Jordan, Kuwait, UAE leh Qatar te nena thlawhna hmanga inkalpawhna chu March 2, 2026 thleng khar a ni," a ti.

Thlawhtheihna tihtawp rih a nih avang hian Middle East ram ṭhenkhat, a bikin UAE (Dubai)-ah tangkhang tam tak an awm mek tih tarlangin Vanlaldina chuan, tangkhang zingah Mizo eng emaw zat an awm tih hriat a nih thu a tarlang a ni.

MIZO DIASPORA CELL TARLAN

Buaina huam china awmte chuan passport leh visa copy, document pawimawh-te photocopy/soft copy neih ṭhat a, original a bo palh pawha backup copy kawl ṭhat te, phone number pawimawh bik mahni emergency contact-te chhinchhiah a, ziah chhuahte a ṭangkai.

Middle East-a awm mek Mizo mipuite chiai mai lo a, sorkar thu ngaichang tur leh zawm tura ngen kan ni. Indian Embassy/Consulate-te thuchhuah ngaichang tur leh awlsam zawka Mizoram sorkar nen chanchin inhriatpawh theihna turin Mizo DiasporaHub-ah inziaklut ṭheuh turin kan inhriattir.

Chief Minister enpuina hnuaiah Mizo Diaspora Cell chuan Middle East rama awm mek Mizo mipuite dinhmun a ngaihven reng a, an dinhmun thlithlai (monitor) chungin hriat tur ṭul apiang inhriattir zel a ni ang.