Police-te'n meth leh heroin an man

Mizoram Police chuan ruihhlo do beihpui an thlak chhunzawm zel a; tun hnai khan hmun hrang hrangah ruihhlo eng emaw zat an man.

Saitual police-te chuan March 1, Pathianni khan Manipur aṭanga lak luh methamphetamine kg. 3.383 an man a; a neitua puh mi pahnih - Hosen Ali (21), Rakhyasini, Assam leh Sujay Chandra Hajong (28) Bhatiapara, Assam, Goalpara district mi ve ve an man bawk a, Saitual Police Station-ah thubuai an ziak lut.

Zokhawthar Police leh Assam Rifles nen ṭang dunin February 28, 2026 khan Zokhawthar daia miin rawksai an kalsanah methamphetamine kg 5.188 an man a, Zokhawthar PS-ah thubuai an ziak lut.

February 27, 2026 zan dar 8:45 khan Dungtlang police-te'n maxicab MZ-01 P-7896, Zokhawthar aṭanga kal aṭangin methamphetamine kg. 5.900 leh heroin gram 68 an man a, lirthei khalhtu Lalruatmawia, Zokhawthar leh a chuanpui Lalduhawmi, Champhai Venglai an man nghal bawk. Dungtlang PS-ah thubuai ziah luh a ni.

Dungtlang police-te hian an chhui zuina aṭangin maxicab-a chuang ve, Dungtlang police checkgate kea hêltu HT Rodawngliana (22), Zokhawthar chu Dungtlang dáiah an man leh a, a hnen aṭangin methamphetamine kg. 3 man bawk.

February 24, 2026 khan Special Narcotics Police Station leh 34th Assam Rifles ten Tuikhuahtlangah Lianthangpuia (48), SK Khuala (L), Khatla South leh Lalbiakmuani (52), Khatla North nia insawi hnen aṭangin crystal meth kg. 2.045 an man a; Special Narcotics PS-ah thubuai an ziak lut a ni.