Mizoram Literature Festival buatsaih a ni

LEI Mizoram Literature Festival vawi hnihna chu February 27-28, 2026 chhung khan Aijal Club-ah buatsaih a ni a, ziakmi leh mithiamte nen hun hman a ni. A ni khatna hi minister Dr Vanlalthlana'n a hmanpui a, ni hnihna chu chief secretary hlui Dr Renu Sharma-i'n a hmanpui.

Festival-ah hian ziaktu lâr - Shobha Dé, Jerry Pinto, Sanjoy Hazarika, Preeti Gill, Guru Ladakhi, Damodar Mauzo, Arundhati Subramaniam, Rashmi Narzary, Pankaj Thapa leh Sandeep Menon te bakah, Mizo ziakmi leh mithiam Prof. Margaret L Pachuau, Prof. Lalbiakdiki Hnamte, Dr Lalrinsangi Nghinglova, Dawngi Chawngthu, Zualteii Poonte, F Vanlalrochana, Dr Lalnunsanga Ralte, Dr Hannah Lalhlanpuii, Ben Zongte, Jacqueline, Ramlawt Dinpuia, Tatea Royte, PC Lalhruaitluanga leh LV Malsawmtluanga ten hun an hmang a ni.

Festival hawnnaah Dr Vanlalthlana'n thuchah a sawi bakah, 'The Art of Satire in illustration' session-ah ama lemziah pho lan pahin amah kawmna hun a buatsaih a; Shobha Dé chuan Festival thupui 'Celebrating the word' tih a sawi.

Ni hnihnaah Dr Renu Sharma chuan Mizorama a awm laia a hun hman dante a sawi a; Japan Centre of Excellence adviser Tomio Isogai pawhin Japan leh hmarchhak state-te thawhho theihna hrang hrang a tarlang bawk.