Paite hnam huphurhna vangah ngai

Siamsinpawlpi (Paite Students Welfare Association) Headquarters, Aizawl chuan thuchhuah siamin, Assembly session-ah Sialkal Range Development Council (SRDC) Bill chungchanga thutlukna siam dan chu Paite hnam huphurhna vang nia an hriat thu an tarlang.

Siamsinpawlpi chuan, Assembly House-a February 23, 2026-a SRDC Bill sawihona chungchang tarlangin, "Opposition-te duh dan anga ngaih theih tura thutlukna a awm ta leh, chumi atana hmalakna a awm hi kan nihna ai maha Paite hnam dah sanna leh huphurhna vang niin kan hria. SRDC hi Paite hnam bil ta a ni lo a, Paite hnamte hmalaknaa din a ni hek lo," an ti.

SRDC chu sorkarin Sialkal tlanga cheng, khawsaknaa hnufual zawkte'n mi dang ruala hmasawnna an hmuh ve theihna tura din a nih thu sawiin Siamsinpawlpi chuan, "A huam chhunga chengte hi Paite an lo ni mai zawk a ni. SRDC Bill hi council thar siamna tur ni loin, sorkar notification awm mek act-a thlakna tur mai a ni," an ti a; Paitete'n tharum thawhna ṭha an tih ngai loh thu an sawi.