IAS coaching kal turte laptop hlân

Aizawl Souh-I bialtu MLA C Lalsawivunga chuan a bial chhunga mi pahnih, Mizoram Youth Commission (MYC)-in IAS coaching kal tura a thlan Malsawmkima, College Veng leh Andrew C Zonunmawia, Bethlehem Vengte hnenah nimin khan laptop a hlân.

C Lalsawivunga chuan, MYC-in a sensoa IAS coaching kal tura a thlan a bial mite chu a chhuan thu sawiin, "In kal zelnaah harsatna emaw, buaina emaw in tawk a nih chuan in tan theihtawp ka chhuah zel dawn a, kan inhuam em em a ni," a ti a; an hriselna vawng ṭha a, IAS ni thei ngei tura ṭang turin a fuih.

Mizoin direct IAS mi 44 a neih tawh zinga a tam zawk chu an pension tawh tih sawiin C Lalsawivunga chuan, "IAS kan neih hnuhnun ber chu kum 2012 kha a ni tawh. Nakin lawkah chief secretary, secretary, commissioner, DC, SP-ahte hian hnam dang, vai kan tih te, Chakma leh Tuikukte an rawn luh ní a awm ngei ngei dawn. Zirlaite kan ṭhanharh a, kan ram leh hnam tan tia UPSC paltlanga IAS, IPS tal nih kan tum a ngai a ni," a ti.