Pawn lama inthiarna awm lohna District hmasa ber Champhai dist.

Champhai district chu páwn lama inthiar awm lohna district, Open Defection Free (ODF)-ah December 19, 2016 khan puan a ni a, Mizorama ODF-a district puan hmasak ber a ni.

ODF-a Champhai district puan a nih tak hriattirna certificate chu December 19 khan chief secretary Lalmalsawma'n Champhai district-a sorkar hotute hnenah a hlan.

Champhai district pum ODF-a puang tur hian kum 2011-12 ah hma an la ṭan a, sorkar laipuiin India ram pum ODF-a puan a tum zûlzuiin kum 2015 laihâwl aṭangin ODF-a puan theih nih tumin beihpui an thlak a; hmalak ṭan aṭanga tun thlengin êk-in 6,369 sak a ni tawh.

District chhunga khaw hrang hrangte ODF-a an inpuan hnuah an awmna BDO-ah an inhriattir a, BDO leh PHE SDO-te'n ṭum hnih an endik. BDO khat huam chhunga khaw tinte ODF-a puan a nih hnuah, BDO-in an block chu ODF-a puan theih a nih thu DC-ah an hriattir a; district level team-in an enfiahna aṭanga an lungawi chuan RD block chu ODF-ah puan leh a ni. Champhai district-a RD block zawng zawngte chu September 15, 2016-ah ODF-ah puan a ni.

District pum ODF-a puan theih a nih thu Cham-phai DC-in September 23-ah Chief Secretary a hriattir a, PHE Secretary kaihhruai state level verification team-in an enfiah. Verification team hian Champhai district rural village 80 zinga 20 an endik a; ODF-a puan tlaka a ngaih hnuah Champhai district chu December 19 khan ODF-ah puan a ni ta a ni.