Manipur-ah dan loin tuialhthei phur lut

Central YMA Kumpuan Committee chuan, tunlai hian petrol pump ṭhenkhatin Manipur-a zawrh atan petrol leh diesel an hralh nasa niin an hria a, pump neitute chu state dang tana hralh chhuak tawh lo turin an ngen. Hetih lai hian, Food Civil Supply & Consumers Affairs (FCSCA) secretary Dr Franklin Laltinkhuma chuan, pump-te chu motor-ah chauh petrol leh diesel thun tura hriattir an ni tawh tih a sawi.

Vanglaini palai zawhna chhangin Dr Franklin Laltin-khuma chuan, petrol leh diesel-te state dang tana hralh a nih tawh lohna atan hma an lak tawh thu a sawi a, "Petrol pump-te chu motor-ah bak petrol leh diesel phur tawh lo tura tih an nih bakah, Zemabawkah Legal Metrology hnathawkte an duty a, state danga hralh tur petrol leh diesel phurte chu an man hmak hmak ang," a ti.

CYMA Kumpuan Committee chairman Vanlalruata chuan, petrol pump-a petrol leh diesel khaihlak nia thu an dawn chu an chhui chian tawh thu sawiin, "State páwn lama man to zawka hralh tura lak ṭhin a ni tih hriat a ni. Petrol leh diesel hi 407 truck leh pick-up hmangtein Manipur-ah barrel tam tak an phur tawh tih kan dawng," a ti a; mipui hriat loha petrol leh diesel eng emaw zat state danga hralh a ni chu ṭha an tih loh thu Vanglaini a hrilh.

Krismas lo thleng turah mipuite'n an mamawh nasat zual laia petrol leh diesel hnianghnâra lei tur awm lo chu Central YMA-in ṭha a ti lo tih sawiin Vanlalruata chuan, "Mizoram tana phurh luh tawh chu Mizoram chhunga hnianghnâr taka hralh chhuah a nih theihna turin hmalak zel a ni ang," a ti.

CYMA Vice President chuan, Mizoram aṭanga Manipur-a an phurh luhna kawnga YMA branch awmna zawngah zawngah dan loa petrol leh diesel phurtute hi lo dan an nih tur thu leh a ṭul anga an chunga thil tih zel a nih tur thu sawiin, "Vawiinah pawh truck pakhat chu an lo dang a ni," a ti a; an kal zel dan tur chu Mizoram leh Manipur-a tuialhthei dinhmun thlir chunga an la ngaihtuah zel tur thu a sawi.