SYS minister Zodintluanga'n inenfiah turin Sport association hrang hrangte a chah

Sports & Youth Services minister Zodintluanga hoin a pisaah nimin khan Mizoram State Sports Council (MSSC)-in kumina an hnathawh leh hlawhtlinnate thlir letna leh weightlifting-a international level-a medal pathum latu Jeremy Lalrinnunga lawmpuina hun an hmang. Minister chuan, infiammi chher chhuah kawngah sport association hrang hrangte inenfiahna turin a chah.

Zodintluanga chuan, Jeremy Lalrinnunga'n Commonwealth Youth Weightlifting Championship, Penang, malaysia-a gold medal a la te, IWF World Youth Wightlifting Championship, Penang, Malaysia-a silver medal a la leh, Asian Youth Weightlifting Championship, Tokyo, Japan-a silver medal a la chu ropui a tih thu a sawi.

Sports Minister chuan, Jeremy Lalrinnunga'n phai lama an training-naah kum khat chhung chu rit chawi loin a bulṭhut (technic) chauh an zir tih a sawi chu Mizoram pawhin entawn ve a ṭhat thu a sawi a, "Kan association-te'n a lungphùm hi kan la phúm loin ka hria. Hmanrua a ṭha ber kan duh nghal ringawtte hi a fuh ber lo. Catch Them Young kan ti a, hmanrua ṭha ber aṭangin kan ti nghal a; a technic aṭanga ṭan loin game-ah kan lut nghal zel a, hei hi kan kalphung fuh lo a ni," a ti.

Infiamna hmunhma leh hmanrua siama buatsaih kawng-ah sorkarin a ti ṭha thawkhata a hriat thu sawiin, Minister chuan, "Catch Them Young hi association ṭhenkhat chuan a phawvuakah an ti niin a lang. Game-a lut nghal loa technic ringawt kum khat zir ang chite hi Mizo naupangte'n kan tlin a ngai tawh a, Mizo ṭhalaiteah talent chu a awm a ni," a ti a; Jeremy Lalrinnunga te inzir dan aṭangin inen lêtna tur a tam thu a sawi.

Zodintluanga chuan, "Tun hmain mipuiin khelmual ṭha, infrastructure an au a. Tunah chuan khelmual ṭha, infrastructure ṭra sorkarin kan pe tawh a ni," a ti bawk.

Inkhawm kaihruaitu, Hmingdailova Khiangte, parliamentary secretary (SYS) chuan, infiamnaah Mizoram chu India ramin a chhoh en tawh nia sawiin, "Mizoram aṭangin player an thlang reng a, kan ram hi 'hunting ground' a ni tawh. Kan player-te future a bright em em a ni," a ti a; Mizo player-te'n Mizoram an chawimawi tih a sawi.

MSSC secretary C Laltlan-thang-a'n report a pek danin, January 1 - December 20, 2016 chhung-in Mizoram infiam-mite'n inter-national competition-ah gold medal 31, silver medal 12 leh bronze medal 11 an la a; national level-ah gold 55, silver 17 leh bronze 31 lain, regional level-ah gold 32, silver 29 leh bronze 20 an la a ni.

Mizoram páwna Mizoram player-te'n medal lak zawng zawng chu gold 118, silver 58 leh bronze 32 a ni a, a vaiin medal 208 a ni. Heng bakah hian, invitation tournament leh tournament dangah karate, sepaktakraw leh taekwondo-ahte medal ṭhahnem tak lak a ni bawk.