State Road Safety Council an ṭhukhawm

Lirtheia chuang leh kawngpui dunga veivâkte him zawkna tura rua-hmanna siam tura din, Mizoram State Road Safety Council (MSRSC) chu nimin khan an chairman John Rotluangliana, Transport minister hoin a pisaah an ṭhukhawm.

John Rotluangliana chuan, "Natna khirh leh hlauhawm pui pui aiin kum tin lirtheia chet-sualna vanga nunna chán an tam zawk avangin lirtheia chuangte an him zawkna tur kawng dap hi hna pawimawh tak a ni. Lirthei hmangtute an him zawkna tur leh lirtheia chetsualna a tlem zawk-na tura ruahmanna siam mek a nih rualin, hemi kawnga inkaihruaina tur dan 'State Road Safety Council Act' pawh Legislative Assembly-ah a rang lama pharh a nih theihna turin uluk taka duan mek a ni," a ti.

Meeting-ah hian MSRSC rawtna siam leh hmachhawpte bawhzui tura Lead Agency din chungchang te, MSRSC hnathawhna tur sum dap dan tur te, lirtheia chet-sualna a tlem theihna tura ruahmanna siam te, chetsualna thlen zinna hmun zawn chhuaha hmun him zawka chantir te, kawng siam a nih apianga road safety audit neih hmasak tur chungchang te, licence pek chhuah khirh zawka kalpui te, lirthei khalhtu dan bawhchhiate licence hrênsak te, state chhung kawngpui leh National Highway dunga zu dawr awmte metre 100 aia hlaa sawn chhuahte an rel.

MSRSC hi November 25, 2016-a din niin, nimin kha an vawi khat ṭhutkhawmna a ni a, vice chairman chu parliamentary secretary (Transport) TT Zothansanga a ni. Transport Secretary chu member secretary a ni a; member-te chu - Home Secretary, Finance Secretary, Planning Secretary, Health Secretary, PWD Secretary, UDPA Secretary, School Education Secretary, ICT Secretary, Excise & Narcotics Secretary, AMC CEO, Lead Agency leh Transport Director-te an ni.