Mamitah Krismas thilpek sem a ni

Samaritan Society of Mizoram (SSM) bultumin nimin khan Mamit Chhimveng YMA hall-ah Mamit khawpui leh a chhehvel khuaa mi harsate hnenah Krismas thilpek atan thawmhnaw sem a ni a, Mamit additional DC H Lianzela'n a hmanpui.

H Lianzela chuan, mi dangte tana luang chhuak thei tura Samaritan Society of Mizoram hmalakna leh inpekna chu lawmawm a tih thu leh, hetianga buatsaih a nih theihna tura pawl leh mimal inphalte chungah lawmthu a sawi a; thilpek dawngtute chu mi dangte tana luang chhuak ve thei tur khawpa hun kalzel turah malsawmna dawng turin duhsakna a hlan.

SSM hi kum 1990 khan Mizoramah ding ṭanin, din a nih aṭangin mi harsa leh chhuan­chham leh kawng danga ṭanpui ngaite an ṭanpui ṭhin a; kum tin Krismas dawnah chhungkaw harsa, thawmhnaw leina nei lo YMA-te’n an thlan chhuahte hnenah thawm­hnaw an sem ṭhin a ni.